Ontario மாகாணத்தின் ஐந்து பிரதான கல்வித் தொழிற்சங்கங்கள் வேலை நிறுத்த அதிகாரத்தை பெற்றுள்ளன.
தங்களின் உறுப்பினர்களிடம் நடத்திய வாக்கெடுப்பில் தொழிற்சங்கங்கள் 94 முதல் 98 சதவீத ஆதரவுடன் இந்த வேலை நிறுத்த அதிகாரத்தை பெற்றுள்ளன.
இருப்பினும், இந்த எதிரொலியாக உடனடியாக வேலை நிறுத்தம் ஆரம்பிக்கப்படாது எனவும், பாடசாலைகள் தற்போதைக்கு மூடப்படாது எனவும் தொழிற்சங்க நிர்வாகிகளும் மாகாண அரசும் உறுதிப்படுத்தியுள்ளன.
வேலை நிறுத்த அதிகாரம் என்பது பேச்சுவார்த்தைகள் முறிந்தால் தொழிற்சங்கம் நடவடிக்கை எடுப்பதற்கான அங்கீகாரம் மட்டுமே தவிர, உடனடி வேலைநிறுத்த அறிவிப்பு அல்ல என் அவர்கல் குறிப்பிடுகின்றனர்.
Ontario தொழிலாளர் உறவுகள் சட்டத்தின் கீழ், சட்டபூர்வமான வேலை நிறுத்தம் ஆரம்பிப்பதற்கு முன்னர் சமரசப் பேச்சுவார்த்தை, No-boardஅறிக்கை வெளியிடப்பட வேண்டும் என்பது குறிப்பிடதக்கது.
No-board அறிக்கை வெளியிடப்பட்ட பின்னர் 17 நாட்கள் கால அவகாசம் ஆரம்பிப்பதுடன், வேலைநிறுத்தம் ஆரம்பிப்பதற்கு குறைந்தது 5 நாட்களுக்கு முன்பாக அறிவிப்பு வழங்கப்பட வேண்டும் என்ற நடைமுறையும் உள்ளது.
இந்த நிலையில் நத்தார் விடுமுறைக்கு முன்பாக வேலை நிறுத்தம் ஏற்படுவதற்கான வாய்ப்பு மிகவும் குறைவு என Ontario ஆங்கிலக் கத்தோலிக்க ஆசிரியர்கள் சங்கத்தின் (OECTA) தலைவர் René Jansen in de Walதெரிவித்துள்ளார்.
அதேவேளை உடனடி வேலை நிறுத்த அச்சுறுத்தல் எதுவும் இல்லை எனத் தெரிவித்துள்ள கல்வி அமைச்சர் Paul Calandra, வெள்ளிக்கிழமை (20) முதல் பேச்சுவார்த்தைகள் ஆரம்பிப்பதாகவும், ஒப்பந்தத்தை எட்டப் போதிய நேரம் உள்ளதாகவும் கூறியுள்ளார்.
வகுப்பறைகளில் அதிகரித்து வரும் மாணவர்களின் எண்ணிக்கை , சிறப்புத் தேவைகள் கொண்ட மாணவர்களுக்கான போதிய உதவிகள் இல்லாமை, மனநலச் சேவைகள் ஆகியவற்றில் அரசு கவனம் செலுத்த வேண்டும் எனத் தொழிற்சங்கங்கள் வலியுறுத்துகின்றன.
கடந்த 8 ஆண்டுகால அரசு நிதி வெட்டுக்களால் ஏற்பட்டுள்ள விரக்தியையே இந்த வாக்கெடுப்பு காட்டுவதாக OSSTF தலைவர் Martha Hradowy கூறியுள்ளார்.
இது குடும்பங்களுக்கான எச்சரிக்கை அல்ல எனவும், அரசாங்கத்திற்கான செய்தி மட்டுமே என ஆரம்பப் பாடசாலை ஆசிரியர் கூட்டமைப்பின் (ETFO) தலைவர் David Mastin தெரிவித்துள்ளார்.
French மொழி ஆசிரியர் சங்கமான AEFO, கல்வியாண்டு பாதிக்கப்படாமல் ஒப்பந்தம் எட்டுவதே தங்களின் முன்னுரிமை எனத் தெரிவித்துள்ளது
February 2020-இல் Ontario-வின் நான்கு முக்கிய ஆசிரியர் சங்கங்களும் 1997-க்குப் பின்னர் முதல் முறையாக இணைந்து ஒருநாள் மாகாணம் தழுவிய வேலை நிறுத்தத்தில் ஈடுபட்டன
November 2022-இல் சுமார் 55,000 CUPE கல்வி ஊழியர்கள் வேலை நிறுத்தத்தில் இறங்கியபோது, Doug Ford அரசு Notwithstanding clause சிறப்புச் சட்டத்தைப் பயன்படுத்தி வேலை நிறுத்தத்திற்குத் தடை விதித்தது.
பின்னர் எழுந்த கடும் எதிர்ப்பை தொடர்ந்து அச்சட்டத்தைத் திரும்பப் பெற்ற மாகாண அரசாங்கம் பேச்சுவார்த்தை நடத்தியது குறிப்பிடத்தக்கது.
