British Columbia மாகாணத்தில் கால அட்டவணைக்கு முன்னதாகவே செவ்வாய்க்கிழமை (22) தேர்தல் அறிவிக்கப்பட்டுள்ளது.
BC மாகாணத்திற்கான தேர்தல் October 24 அன்று நடைபெறும் என அதிகாரப்பூர்வமாக அறிவிக்கப்பட்டுள்ளது.
இதன் மூலம் வாக்காளர்கள் கடந்த இரண்டு ஆண்டுகளில் நான்காவது முறையாக தேர்தல் களத்தை எதிர்கொள்கின்றனர்.
BC மாகாணத்தின் தற்போதைய ஆளும் NDP கட்சியின் தலைவரும் முதல்வருமான David Eby, மாகாண ஆளுநரை சந்தித்து சட்டசபையை கலைப்பதற்கான அதிகாரப்பூர்வ உத்தரவை பெற்றுக் கொண்டார்.
அமெரிக்க ஜனாதிபதியின் புதிய அச்சுறுத்தலுக்கு மத்தியில் புதிய மக்கள் ஆணையின் அவசியத்தை David Eby வலியுறுத்தினார்.
அமெரிக்காவின் கடுமையான வர்த்தகக் கொள்கைகளும், கனடாவுக்கு எதிரான பொருளாதார நடவடிக்கைகளும் BC மாகாணத்தின் பொருளாதாரத்திற்கு ஒரு அச்சுறுத்தலாக உருவெடுத்துள்ளதாக முதல்வர் சுட்டிக்காட்டியுள்ளார்.
இந்த இக்கட்டான சர்வதேசச் சூழ்நிலையில், அமெரிக்காவின் அழுத்தங்களை எதிர்கொண்டு மாகாணத்தின் வர்த்தகம், மக்களின் வாழ்வாதாரத்தை பாதுகாக்க தங்களுக்கு வலுவான புதிய மக்கள் ஆணை தேவைப்படுவதால் இந்த அவசரத் தேர்தல் முடிவை எடுத்ததாக அவர் நியாயப்படுத்தியுள்ளார்.
BC மாகாணத்தின் பிரதான எதிர்க்கட்சியான Conservative கட்சியின் தலைவர் Kerry-Lynne Findlay கடுமையான உட்கட்சிப் பூசல்களை எதிர்கொண்டு கடந்த வார இறுதியில் பதவி விலகினார்.
இந்த நிலையில் ஆளும் NDP அவசர தேர்தலை அறிவித்திருப்பது மாகாண அரசியலில் பெரும் விவாதத்தை ஏற்படுத்தியுள்ளது.
