Belleville பகுதியில் உள்ள Sons of Jacob Synagogue யூத வழிபாட்டு தலத்திற்கு (Synagogue) வெளியே நடத்தப்பட்ட துப்பாக்கிச் சூட்டு சம்பவத்தின் சந்தேக நபர் அடையாளம் காணப்பட்டார்.
Belleville நகரில் ஞாயிற்றுக்கிழமை (20) இரவு நிகழ்ந்த துப்பாக்கிச் சூட்டுச் சம்பவத்தில், காவல்துறை அதிகாரி ஒருவர் உட்பட இருவர் படுகாயமடைந்துள்ளனர்.
யூத சமூகத்தினர் தங்களின் புனித நாளான Yom Kippu வழிபாட்டிற்காக கூடியிருந்த வேளையில் இந்தத் தாக்குதல் நடந்துள்ளது.
இந்த துப்பாக்கிச் சூட்டில் ஈடுபட்டு கைதான சந்தேக நபர் 29 வயதான Sean Ward என அடையாளம் காணப்பட்டார்.
Quinte West பகுதியைச் சேர்ந்த அவர், தற்போது மருத்துவமனையில் உயிருக்கு ஆபத்தான நிலையில் தீவிர சிகிச்சைப் பிரிவில் அனுமதிக்கப்பட்டுள்ளார்.
விசாரணை தொடரும் நிலையில் சந்தேக நபர் மீது என்ன குற்றச்சாட்டுகள் பதிவு செய்யப்படும் என்பது இன்னும் தெளிவாகத் தெரியவில்லை.
யூத சமூகத்தினர் தங்களது புனித நாள் வழிபாட்டிற்கு தயாராகிக் கொண்டிருந்த வேளையில், சந்தேக நபர் ஒரு வாகனத்தில் துப்பாக்கியுடன் சம்பவ இடத்திற்கு சென்றார் என ஆரம்பக்கட்ட விசாரணையில் தெரியவருகிறது.
அங்குப் பாதுகாப்பில் இருந்த காவல்துறை அதிகாரியை நோக்கி அவர் துப்பாக்கியால் சுட தொடங்கியுள்ளார்.
இதையடுத்து, அந்த அதிகாரி உடனடியாகப் பதில் துப்பாக்கி தாக்குதல் நடத்தினார்.
சம்பவ இடத்திற்கு விரைந்த இரண்டாவது காவல்துறை அதிகாரியும் சந்தேக நபரை நோக்கி துப்பாக்கியால் சுட்டுள்ளார்.
இதில் காயமடைந்த காவல்துறை அதிகாரி ஆபத்தான நிலையை தாண்டி உள்ளதாக தெரிவிக்கப்படுகிறது.
காயமடைந்த காவல்துறை அதிகாரி 13 ஆண்டுகள் அனுபவம் வாய்ந்த Cst. Jeff Smith என Belleville நகர துணை காவல்துறை அதிகாரி Sheri Meeks தெரிவித்தார்.
இவர் தொடர்ந்தும் மருத்துவமனையில் சிகிச்சை பெற்று வருகிறார்.
அவர் முழுமையாக குணமடைய நீண்ட காலம் தேவைப்படும் எனத் தெரிவிக்கப்பட்டுள்ளது.
இந்தச் சம்பவத்தில் காவல்துறையினர் துப்பாக்கி சூடு நடத்தியுள்ளதால், மாகாணத்தின் சிறப்பு புலனாய்வுப் பிரிவு (SIU) இந்த வழக்கின் முழு விசாரணையையும் மேற்கொண்டு வருகிறது.
இந்தத் தாக்குதலைத் தொடர்ந்து, முன்னெச்சரிக்கை நடவடிக்கையாக கனடாவின் முக்கிய நகரங்களில் உள்ள யூத வழிபாட்டுத் தலங்களுக்கும் பாதுகாப்பு பலப்படுத்தப்பட்டு காவல்துறையினர் ரோந்து நடவடிக்கை தீவிரப்படுத்தப்பட்டுள்ளது.
