கனடாவின் வரவு செலவுத் திட்டம் அடுத்த ஆண்டு சமநிலைப்படுத்தும் என அறிவிக்கப்படுகிறது.
பிரதமர் Mark Carney செவ்வாய்க்கிழமை (15) இந்த அறிவிப்பை வெளியிட்டார்.
கனடா தனது செயல்பாட்டு வரவு செலவுத் திட்டத்தை அடுத்த ஆண்டே சமநிலைப்படுத்தும் இலக்கை எட்டும் என பிரதமர் அறிவித்துள்ளார்.
அடுத்த ஆண்டிற்குள் நாட்டின் செயல்பாட்டு பற்றாக்குறையை முழுமையாக ஒழித்து, வரவு செலவுத் திட்டத்தை சமநிலைக்கு கொண்டு வர அரசாங்கம் திட்டமிட்டுள்ளது.
Toronto நகரில் நடைபெற்று வரும் முதலாவது கனடா முதலீட்டு மாநாட்டின் இரண்டாம் நாள் அமர்வில் இந்த அறிவித்தல் வெளியானது.
உலகளாவிய சொத்து மேலாளர்கள், சர்வதேச நிதியாளர்கள் மத்தியில் உரையாற்றிய பிரதமர் இந்த முக்கிய நிதிநிலை அறிவிப்பை வெளியிட்டார்.
பிரதமரின் இந்த அறிவிப்பை மாநாட்டில் குழுமியிருந்த வணிகத் தலைவர்கள் வரவேற்றனர்.
தற்போதைய பொருளாதார நெருக்கடிகளுக்கு மத்தியிலும், G7 உறுப்பு நாடுகளில் மிகக் குறைந்த ஒட்டுமொத்த பற்றாக்குறையைக் கொண்ட நாடாக கனடா தொடர்ந்து நீடிக்கும் என Mark Carney உறுதியளித்துள்ளார்.
பிரதமரின் இந்த அதிரடி நிதிநிலை கணிப்புகள் குறித்துக் கனடாவின் பொருளாதார நிபுணர்கள், எதிர்க்கட்சித் தலைவர்கள் கடுமையான விமர்சனங்களை முன்வைத்துள்ளனர்.
