Scarborough நாடாளுமன்ற உறுப்பினரின் இல்லத்திற்கு வெளியே வாகனங்களுக்கு தீ வைப்பு சம்பவத்தில் 24 வயது வாலிபர் கைது செய்யப்பட்டார்.
நாடாளுமன்ற உறுப்பினர் Salma Zahid-ரின் இல்லத்திற்கு வெளியே நிறுத்தப்பட்டிருந்த வாகனங்களுக்கு தீ வைத்த வழக்கில், 24 வயதான Roshvin Crofton கைது செய்யப்பட்டார்.
Toronto காவல்துறையினர் இந்த கைது குறித்த விவரங்களை வெள்ளிக்கிழமை (04) அதிகாரப்பூர்வ செய்திக்குறிப்பில் வெளியிட்டனர்.
கடந்த 27-ஆம் திகதி அதிகாலை, Bellamy Road North – Lawrence Avenue கிழக்கு பகுதிக்கு அருகில் உள்ள Liberal கட்சி நாடாளுமன்ற உறுப்பினரின் இல்லத்தின் முன்பாக இந்த சம்பவம் நிகழ்ந்துள்ளது.
சந்தேக நபர் அங்கு நிறுத்தப்பட்டிருந்த வாகனங்கள் மீது எரியக்கூடிய திரவத்தை ஊற்றி தீ வைத்துள்ளார்.
இந்தத் தீ விபத்தில் இரண்டு வாகனங்கள் முற்றிலும் எரிந்து நாசமாகின; மூன்றாவது வாகனம் ஒன்றும் பலத்த சேதமடைந்தது.
இந்தச் சம்பவத்தில் எவருக்கும் காயம் ஏற்படவில்லை.
இதன் சந்தேக நபர் August 30 அன்று கைது செய்யப்பட்ட போதிலும், வெள்ளியன்று அவரது பெயர் விபரம் வெளியிடப்பட்டுள்ளது.
இவர் மீது பல்வேறு கடுமையான பிரிவுகளின் கீழ் காவல்துறையினர் வழக்குப்பதிவு செய்துள்ளனர்.
இதில் சந்தேக நபருக்கு எதிரான குற்றச்சாட்டுக்கள் எதுவும் இதுவரை நீதிமன்றத்தில் நிரூபிக்கப்படவில்லை என்பது இங்கு குறிப்பிடத்தக்கது.
இந்தத் தாக்குதலுக்கான துல்லியமான காரணம் என்ன என்பதும், இது நாடாளுமன்ற உறுப்பினரை திட்டமிட்டு குறிவைத்து நடத்தப்பட்டதா என்பதும் இன்னும் தெளிவாகத் தெரியவில்லை என காவல்துறையினர் குறிப்பிட்டுள்ளனர்.
ஒரு மக்கள் பிரதிநிதியின் இல்லத்தின் மீது நடத்தப்பட்ட இந்த வன்முறை சம்பவத்திற்கு பிரதமர் Mark Carney உட்பட அரசியல் தலைவர்கள் தமது கடுமையான கண்டனங்களை பதிவு செய்துள்ளனர்.
