Toronto நகரசபைத் தேர்தலில் முன்னாள் நாடாளுமன்ற உறுப்பினர் Nate Erskine-Smith போட்டியிடுவார் என எதிர்பார்க்கப்படுகிறது.
முன்னாள் Liberal கட்சி நாடாளுமன்ற உறுப்பினரும் அமைச்சருமான Nate Erskine-Smith, Toronto நகர சபை உறுப்பினர் பதவிக்கு போட்டியிடுவார் என எதிர்பார்க்கப்படுகிறது.
வழக்கறிஞராக இருந்து அரசியல்வாதியாக மாறிய அவர், Beaches-East York நகரசபை வேட்பாளராக போட்டியிடுவதற்கு தனது ஆவணங்களைச் சமர்ப்பிக்க உள்ளதாக செவ்வாய்க்கிழமை (18) மாலை உறுதிப்படுத்தினார்.
2015-இல் அதே தொகுதியிலிருந்து நாடாளுமன்றத்தில் தேர்ந்தெடுக்கப்பட்ட 42 வயதான Nate Erskine-Smith, சிறிது காலம் அமைச்சராக பணியாற்றினார்.
பின்னர் கடந்த May மாதம் அவர் பிரதமர் Mark Carney-யால் அமைச்சரவையில் இருந்து நீக்கப்பட்டார்.
மாகாண அரசியலில் தனது கவனத்தைத் திருப்பிய அவர், Ontario Liberal கட்சியின் தலைமையை வெற்றி பெறும் முயற்சியில் ஈடுபட்டார்.
நடைபெற உள்ள இடைத்தேர்தலில் Scarborough Southwest தொகுதிக்கான Liberal கட்சி வேட்பாளராக போட்டியிடவும் அவர் முற்பட்டார்.
அவர் அந்த வேட்பாளர் தேர்வு போட்டியில் தோல்வியடைந்தார்.
பின்னர் அந்த முடிவை எதிர்த்து அவர் முறையிட்டார்.
அந்த மேல்முறையீடு தள்ளுபடி செய்யப்பட்டது.
June மாதத்தில் நாடாளுமன்றத்தில் வகிக்கும் தனது பதவியில் இருந்து விலகுவதாக அவர் அறிவித்தார்.
Toronto நகரசபை உறுப்பினராக 19-வது தொகுதியில் பதவியில் இருப்பவர் மீண்டும் தேர்தலில் போட்டியிடவில்லை.
இந்தத் தொகுதியின் நகரசபை உறுப்பினர் Brad Bradford இம்முறை நகர முதல்வருக்கான தேர்தலில் போட்டியிடப் பிரச்சாரம் செய்து வருகிறார்.
இந்த நிலையில் Nate Erskine-Smith புதன்கிழமை (19) காலை 9 மணி வரை தனது வேட்புமனுவை தாக்கல் செய்யவில்லை.
இதுவரை மொத்தம் 10 வேட்பாளர்கள் Beaches-East York தொகுதியில் தேர்தலில் போட்டியிட வேட்புமனு தாக்கல் செய்துள்ளனர்.
Ontario மாகாணத்தின் பல்வேறு நகரசபை பதவிகளுக்கான வேட்புமனு தாக்கல் கடந்த May மாதம் அதிகாரபூர்வமாக ஆரம்பித்தது.
பல்வேறு நகரசபை பதவிகளுக்கான தேர்தல் October 26-ஆம் திகதி Ontario மாகாணத்தில் நடைபெறுகிறது.
இந்தத் தேர்தலில் முன்கூட்டிய வாக்களிப்பு காலம் October 6 முதல் October 11 வரையாகும்.
இம்முறை தேர்தலுக்கான வேட்பு மனுக்கள் வெள்ளிக்கிழமை (21) பிற்பகல் 2 மணி வரை ஏற்றுக்கொள்ளப்படும் என்பது இங்கு குறிப்பிடத்தக்கது.
