அமெரிக்க வர்த்தக பிரதிநிதிகளுடன் பேச்சுவார்த்தைகள் ‘தொடர்வதாக’ கனடா-அமெரிக்க வர்த்தக அமைச்சர் Dominic LeBlanc தெரிவித்தார்.
50 சதவீத இறக்குமதி வரி அமுலுக்கு வரும் திகதி நெருங்கும் நிலையில் இந்தக் கருத்தை அவர் தெரிவித்தார்.
கனடா, அமெரிக்கா வர்த்தக பிரதிநிதிகள் இந்த வாரத்தில் இரண்டாவது தடவையாக வியாழக்கிழமை (13) சந்தித்தனர்.
வெள்ளை மாளிகையின் அருகில் உள்ள Jamieson Greer-ரின் அலுவலகத்தில் நடைபெற்ற இந்த சந்திப்பு 90 நிமிடங்கள் நீடித்தது.
எத்தனை சந்திப்புகள் தேவைப்படுகிறதோ அத்தனை சந்திப்புகளையும் நடத்துவோம் என Minister Dominic LeBlanc இந்த சந்திப்பின் பின்னர் கூறினார்.
இந்தச் சந்திப்பில் அமைச்சர் Dominic LeBlanc, கனடாவின் முதன்மை வர்த்தக பேச்சுவார்த்தையாளர் Janice Charette, அமெரிக்க வர்த்தக பிரதிநிதி Jamieson Greer ஆகியோர் பங்கேற்றனர்.
“பேச்சுவார்த்தைகள் தொடர்ந்து நடைபெற்று வருகின்றன; கனடாவின் நலன்களை நாங்கள் தொடர்ந்து முன்னெடுத்து வருகிறோம்” என இந்த சந்திப்பின் பின்னர் அமைச்சர் Dominic LeBlanc தனது X தளத்தில் பதிவிட்டுள்ளார்.
கனடாவின் பல்வேறு வகையான பொருட்கள் மீது 50 சதவீத அளவில் புதிய சுங்க வரிகளை விதிப்பதற்கு அமெரிக்க ஜனாதிபதி Donald Trump நிர்ணயித்த காலக்கெடு முடிவதற்கு ஆறு நாட்களுக்கு முன்னதாக இந்த சந்திப்பு நடைபெற்றது.
குறைந்தபட்சம் ஓரளவிற்காவது சுங்க வரிகளை தக்கவைக்க Donald Trump நிர்வாகம் அழுத்தம் கொடுத்து வருவதாக இந்த பேச்சுவார்த்தைகள் குறித்து நேரடியாக அறிந்த வட்டாரங்கள் மூலம் தகவல் வெளியாகிறது.
இதில் கனடா மேலதிக சலுகைகளை அளிக்கும் என எதிர்பார்க்கப்படுவதாக தகவல்கள் மேலும் தெரிவித்தன.
அர்த்தமுள்ள சுங்க வரிச் சலுகைகள் இன்றி, மாகாணங்களை கனடிய மத்திய அரசால் கட்டாயப்படுத்த முடியாது என்பது அமெரிக்கத் தரப்பினருக்கு கனடாவினால் இந்த சந்திப்பில் தெரிவிக்கப்பட்டதாகவும் தகவல் அறிந்த வட்டாரம் ஒன்று கூறியது.
வரிகள் போதுமான அளவு குறைக்க படாவிட்டால் ஒப்பந்தத்திலிருந்து விலகிக்கொள்ள கனடா தயாராக இருந்தாலும், தாங்கள் செயல்படுத்த முற்படும் மூன்று கட்ட வர்த்தக உத்தியின் ஒரு பகுதியாக, உடனடியாக ஒரு ஒப்பந்தத்தை எட்டவே Mark Carney அரசாங்கம் முன்னுரிமை அளிப்பதாக தகவல்கள் தெரிவிக்கின்றன.
கனடா, அமெரிக்க அதிகாரிகள் எதிர்வரும் புதன்கிழமைக்கு (19) முன்னதாகவே அமெரிக்க ஜனாதிபதியிடம் ஒரு ஒப்பந்த வரைவை சமர்ப்பிக்க எதிர்பார்ப்பதாக தெரியவருகிறது.
அடுத்த வாரம் Donald Trump நிர்வாகம் புதிய வரிகளை விதித்தால், மேலதிக வர்த்தக பேச்சுவார்த்தைகள் ஆபத்தில் சிக்க கூடும் என கனடாவின் முன்னணி வர்த்தக பேச்சுவார்த்தையாளர் Janice Charette தனது அமெரிக்க சகாக்களை எச்சரித்ததாக தகவலறிந்த வட்டாரங்கள் உறுதிப்படுத்தின.
