போலி கனடிய கடவுச்சீட்டு இணையதள நடத்துனர்கள் மீது குற்றச்சாட்டு பதிவானது.
York பிராந்தியத்தைச் சேர்ந்த இருவர் இதில் குற்றச்சாட்டுகளை எதிர்கொள்கின்றனர்.
கனடிய அரசாங்கத்துடன் தொடர்புடையதாகக் கூறிக்கொண்டு, “ஏமாற்றும்” வகையில் கடவுச்சீட்டு இணையதளம் ஒன்றை இவர்கள் நடத்தி வந்ததாக குற்றம் சாட்டப்படுகிறது.
காவல்துறையினர் விசாரணையின் அடிப்படையில் July 22 அன்று John Jesse Breslin, Phoebe Hui Ting Wong ஆகியோர் மீது York பிராந்தியக் காவல்துறையினர் குற்றச்சாட்டுகளை பதிவு செய்தனர்.
Passport Online, Passport Express ஆகிய பெயர்களில் செயல்பட்ட அந்த நிறுவனம், 2016 முதல் 2020 வரையிலான காலகட்டத்தில், வாடிக்கையாளர்கள் கனடிய கடவுச்சீட்டை இணையம் வழியாக விரைவாகவும் எளிதாகவும் பெறவோ அல்லது புதுப்பிக்கவோ முடியும் என்று உணர்த்தும் வகையில் தவறான தகவல்களை பயன்படுத்தியதாக புலனாய்வாளர்கள் தெரிவித்தனர்.
விரைவுபடுத்தப்பட்ட கடவுச்சீட்டு சேவைகளுக்காக, தாங்கள் கனடிய அரசாங்கத்துடன் நேரடியாகத் தொடர்பு கொள்வதாக கனடியர்களை அந்த இணையதளம் நம்பவைத்து ஏமாற்றியதாக கூறப்படுகிறது.
இதில் குற்றம் சாட்டப்பட்டவர்களுக்கு எதிரான குற்றங்கள் எதுவும் இதுவரை நீதிமன்றத்தில் நிரூபிக்கப்படவில்லை.
