Billy Bishop விமான நிலைய விரிவாக்கத் திட்டங்களை மத்திய அரசாங்கம் நிறுத்தி வைத்துள்ளது.
Toronto Billy Bishop விமான நிலையத்தை விரிவுபடுத்துவதற்கான திட்டங்கள் மத்திய அரசால் நிறுத்தி வைக்கப்பட்டுள்ளதாக போக்குவரத்து துறை அமைச்சர் Steven MacKinnon தெரிவித்தார்.
முன்மொழியப்பட்ட Billy Bishop விமான நிலைய விரிவாக்கம் குறித்து Transport கனடா நடத்திய ஆய்வில், அப்பகுதி மக்களிடம் இருந்து 87 ஆயிரத்திற்கும் மேற்பட்ட கருத்துகள் பெறப்பட்டதை தொடர்ந்து இந்த முடிவு எடுக்கப்பட்டுள்ளது.
இந்த நிலையில் Toronto மக்களின் கருத்துக்களுக்கு செவிசாய்த்ததற்காக பிரதமர் Mark Carney, போக்குவரத்து துறை அமைச்சர் ஆகியோருக்கு Toronto நகர Olivia Chow முதல்வர் நன்றி தெரிவித்தார்.
ஆனாலும் இந்த விரிவாக்க முயற்சிகளை தொடர மாகாணம் திட்டமிட்டுள்ளதாக Ontario போக்குவரத்து துறை அமைச்சர் Prabmeet Singh Sarkaria தெரிவித்துள்ளார்.
கடந்த March மாதம், Ontario மாகாண முதல்வர் Doug Ford, Billy Bishop விமான நிலையத்தை விரிவுபடுத்தும் திட்டங்களை அறிவித்தார்.
இந்த விமான நிலையத்தை இயக்கும் மத்திய கட்டுப்பாட்டிலான அமைப்பான Toronto துறைமுக ஆணையத்தின் ஆதரவுடன் இந்த விரிவாக்கம் நடைபெறும் என அவர் அறிவித்திருந்தார்.
சில மாதங்களுக்குப் பின்னர், பல தசாப்தங்களாக விமான நிலையத்தை நிர்வகித்து வந்த முத்தரப்பு ஒப்பந்தத்தின் கீழ் நகரத்திற்கு இருந்த அதிகாரங்களை நீக்கிவிட்டு, விமான நிலைய நிலங்களில் Toronto-வுக்கு சொந்தமான பகுதியின் கட்டுப்பாட்டைத் தன்வசப்படுத்திக் கொள்ள அனுமதிக்கும் சட்டத்தை மாகாண அரசு இயற்றியது.
அதனைத் தொடர்ந்து, விரிவாக்கத் திட்டங்கள் குறித்த கருத்துகளை பெறுவதற்காக Transport கனடா தனது கலந்தாய்வுகளை ஆரம்பித்தது.
இந்த விமான நிலையத்திலிருந்து jet விமானங்கள் இயங்க ஏதுவாக விமான நிலையத்தின் ஓடுபாதையை நீட்டிப்பதே இந்த விரிவாக்கத்தின் நோக்கமாக இருந்தது.
இந்த விரிவாக்கத் திட்டம் கனடாவின் பொருளாதாரத்திற்கு ஆண்டுதோறும் $8.5 பில்லியன் வரை பங்களிக்கும் என Ontario போக்குவரத்து துறை அமைச்சர் கூறினார்.
ஆனாலும் இந்தத் திட்டங்களை அதிகாரத்தை கைப்பற்றும் ஒரு நடவடிக்கை என வர்ணித்த Olivia Chow, Ontario அரசாங்கத்தின் திட்டங்களுக்கு எதிராக சட்ட நடவடிக்கை எடுக்கவுள்ளதாக மிரட்டி இருந்தார்.
இந்த விரிவாக்கத் திட்டம் இப்போது முன்னெடுத்துச் செல்லப்படாத நிலையில், Toronto நகரத்தின் நிலத்தைத் திருப்பித் தருமாறு Doug Ford அரசாங்கத்தை Olivia Chow வலியுறுத்தினார்.
இந்த விரிவாக்கத் திட்டம் அறிவிக்கப்பட போது அதை ஆதரிக்கும் வகையில் கருத்து தெரிவித்த Mark Carney, சில தினங்களில் அதில் இருந்து பின்வாங்கும் வகையில் கருத்து தெரிவித்திருந்தார்.
2015-இல், Justin Trudeau தலைமையிலான மத்திய Liberal அரசாங்கம் விமான நிலையத்தை விரிவுபடுத்துவதற்கான முன்மொழிவுகளை நிராகரித்தது இங்கு குறிப்பிடத்தக்கது.
