அமெரிக்க ஜனாதிபதியின் புதிய இறக்குமதி வரிகளை எதிர்கொள்வதற்கான திட்டத்தை கனடிய பிரதமர் முன்வைப்பதை மாகாண, பிரதேசங்களின் முதல்வர்கள் விரும்புகின்றனர்.
அமெரிக்காவின் நகர்வு ஒரு “புதிய அவசர உணர்வை” அளிப்பதாக முதல்வர்கள் தெளிவுபடுத்துகின்றனர்.
முதல்வர்கள் வியாழக்கிழமை (23) பிரதமர் Mark Carney-யை நேரில் சந்திக்கின்றனர்.
கனடா-அமெரிக்க வர்த்தக அமைச்சர் Dominic LeBlanc, இந்த கூட்டத்தில் இணையவுள்ளார்.
பிரதமருடன் இணைந்து பணியாற்றவும், எங்கள் முன்னுரிமைகளை பகிர்ந்து கொள்ளவும் ஆவலுடன் காத்திருக்கிறோம் என இந்த சந்திப்பு குறித்து P.E.I. முதல்வர் Rob Lantz கூறினார்.
கனடாவின் 13 மாகாண, பிரதேசங்களின் முதல்வர்கள் செவ்வாய்க்கிழமை (21) முதல் Prince Edward தீவில் சந்திக்கின்றனர்.
இந்த வருடாந்த கூட்டத்தின் தலைவராக P.E.I. முதல்வர் உள்ளார்.
மூன்று தினங்களுக்கான இந்த சந்திப்பின் இறுதி நாளான வியாழனன்று அவர்கள் பிரதமர் Mark Carney-யை நேரடியாக சந்திக்கின்றனர்.
அமெரிக்காவின் வரி அச்சுறுத்தலுக்கு மத்தியில் கனடிய அரசாங்கத்தின் பேச்சுவார்த்தைக்கான திட்டம் என்ன என்பதையும் அறிய முதல்வர்கள் ஆர்வம் தெரிவிக்கின்றனர்.
அமெரிக்காவின் புதிய வரி அறிவித்தலுக்கு கனடாவின் பதில் நடவடிக்கை குறித்து கருத்து வேறுபாடுகள் நிலவும் சூழலில், இந்த வரி விதிப்பால் பாதிக்கப்பட்ட அனைத்து துறைகளையும் உள்ளடக்கிய ஒரு விரிவான ஒப்பந்தமே மிகச் சிறந்த தீர்வாக அமையும் என்பதில் அனைத்து முதல்வர்களும் உடன்படுகின்றனர்.
அமெரிக்க ஜனாதிபதி பரிந்துரைத்துள்ள புதிய வரி விதிப்புகளால் அனைத்து மாகாணங்களும் ஒரே அளவிலான நேரடிப் பாதிப்புக்கு உள்ளாகவில்லை என முதல்வர்கள் தெரிவித்துள்ளனர்.
அதேவேளையில், இந்த நிலைமை, ஒன்றிணைந்து செயல்படுவதில் அவர்கள் கொண்டுள்ள உறுதியை மாற்றியமைத்துவிட கூடாது என்பதையும் அவர்கள் வலியுறுத்தியுள்ளனர்.
அமெரிக்காவுடனான பேச்சுவார்த்தைகளின் போது மாகாணங்கள், பிரதேசங்களுடன் தெளிவானதும் உரிய நேரத்தில் கலந்தாலோசிக்கும் நடைமுறையைக் கடைப்பிடிக்குமாறு மத்திய அரசை முதல்வர்கள் வலியுறுத்தினர்.
கனடாவின் பதில் நடவடிக்கையை Mark Carney முன்னின்று வழிநடத்த வேண்டும் எனத் தெரிவித்த Ontario முதல்வர் Doug Ford, அவர் ஒரு வலுவான திட்டத்தை உருவாக்க வேண்டும் எனவும் அந்தத் திட்டத்தை நேரடியாக கேட்டு அறிந்துகொள்ள ஆர்வமாக உள்ளதாகவும் புதன்கிழமை (22) கூறினார்.
அமெரிக்காவுக்கு எதிராக கடுமையான பதில் நடவடிக்கைக்கு அழைப்பு விடுத்ததை தொடர்ந்து, கனடாவின் நடவடிக்கைக்கு பிரதமர் தலைமை தாங்குவார் எனவும் அதற்கு அனைத்து முதல்வர்களும் ஆதரவு தெரிவிப்பார்கள் எனவும் Doug Ford தெரிவித்துள்ளார்.
அமெரிக்காவும் கனடாவும் ஒரு இணக்கத்தை எட்ட முடியும் என முதல்வர்கள் மத்தியில் நம்பிக்கை தெரிவிக்கப்படுகிறது.
எமது திட்டங்களை செம்மைப்படுத்தவும், கவனத்தை ஒருமுகப்படுத்தவும் ஏற்ற ஒரு தருணம் இது என தான் கருதுவதாக புதனன்று நடைபெற்ற செய்தியாளர் சந்திப்பில் Alberta முதல்வர் Danielle Smith கூறினார்.
“அண்மைக் காலத்தில்” ஒரு ஒப்பந்தத்தை எட்டுவது குறித்து Saskatchewan முதல்வர் Scott Moe நம்பிக்கை தெரிவித்தார்.
Donald Trump கனடாவுக்கு எதிராக விதித்துள்ள அல்லது விதிக்கப் போவதாக அச்சுறுத்தியுள்ள அடுக்கடுக்கான வரிகளுக்கு மத்தியில் இந்த ஒப்பந்தத்தின் அவசியத்தையும் அவர் வலியுறுத்தினார்.
