Gordie Howe சர்வதேசப் பாலத்தின் திறப்பு விழாவை கனடாவும் அமெரிக்காவும் கூட்டாக கொண்டாடாது என தெரிவிக்கப்படுகிறது.
Gordie Howe சர்வதேசப் பாலத்தின் நாடா வெட்டும் நிகழ்வு வெள்ளிக்கிழமையும் (24) உத்தியோகபூர்வ திறப்பு விழா திங்கட்கிழமையும் (27) நடைபெறுகிறது.
இந்த திறப்பு விழாவை கனடாவும் அமெரிக்காவும் கூட்டாக கொண்டாடப் போவதில்லை என தற்போது தகவல் வெளியாகியுள்ளது.
அமைச்சர் Gregor Robertson-னின் தகவல் தொடர்பு இயக்குனர் Jenna Ghassabeh, செவ்வாயன்று வெளியிட்ட அறிக்கையில் இதனை உறுதிப்படுத்தினார்.
இந்த வார ஆரம்பத்தில் அமெரிக்கா விடுத்த வர்த்தக நடவடிக்கை தொடர்பான அச்சுறுத்தலைக் கருத்தில் கொண்டு, இரு நாடுகளுக்கும் இடையிலான கொண்டாட்ட நிகழ்வைத் தொடர்ந்து நடத்துவது பொருத்தமற்றதாக இருக்கும் என அந்த அறிக்கை குறிப்பிடுகிறது.
திட்டமிட்டப்படி July 27 பாலத்தைத் திறப்பதற்கும், July 24 கனடியர்களிடையே இந்த முக்கிய மைல்கல்லை கொண்டாடுவதற்கு கனடா தொடர்ந்து உறுதியுடன் உள்ளது என்பதையும் அந்த அறிக்கை வலியுறுத்துகிறது.
அமைச்சர் Gregor Robertson இந்த கொண்டாட்டத்தில் கலந்து கொள்வார் என்பதை அவரது அலுவலகம் உறுதிப்படுத்தியது.
பல்வேறு கனடியப் பொருட்கள் மீது 50 சதவீத இறக்குமதி வரியை விதிக்கப் போவதாக அமெரிக்க ஜனாதிபதி Donald Trump அறிவித்த மறுநாளே இந்த அறிவித்தல் வெளியானது.
இந்த சர்வதேச பாலத்தின் திறப்பு விழாவை குறிக்கும் வகையில் வெள்ளியன்று நடைபெறவுள்ள நிகழ்ச்சியில், கனடாவுக்கான அமெரிக்கத் தூதர் Pete Hoekstra தனது கனடியப் பிரதிநிதியுடன் இணைந்து பங்கேற்க இருப்பதாக திங்கட்கிழமை (20) தெரிவித்திருந்தார்.
ஆனால் இந்த நிகழ்வு கனடியர்களுக்கு மட்டுமானதான ஒரு கொண்டாட்டமாக நடைபெறும் என கனடிய அரசாங்க தரப்பு வட்டாரங்கள் தெரிவிக்கின்றன.
Gordie Howe சர்வதேசப் பாலத்தின் திறப்பு விழா பல்வேறு காரணங்களுக்காக நீண்ட காலமாகத் தாமதமாகி வருவது இங்கு குறிப்பிடத்தக்கது.
