கனடா-அமெரிக்கா-Mexico ஒப்பந்தம் குறித்த பேச்சுவார்த்தைகளில், புதன்கிழமை (01) எந்த ஒரு முடிவும் எட்டப்படும் என எதிர்பார்க்கவில்லை என கனடிய பிரதமர் கூறினார்.
இந்த ஒப்பந்தத்தைப் புதுப்பிப்பதா அல்லது மறு ஆய்வு செய்வதா என்பது குறித்த பேச்சுவார்த்தைகளில், புதன்கிழமை எந்த ஒரு முடிவும் எட்டப்படும் என எதிர்பார்க்கவில்லை என பிரதமர் Mark Carney தெரிவித்தார்.
“ஆக்கப்பூர்வமான கருத்துப் பரிமாற்றத்தை நாங்கள் எதிர்பார்க்கிறோம்,” என செவ்வாயகிழமை (30) செய்தியாளர்களிடம் Mark Carney கூறினார்..
இந்த முத்தரப்பு வர்த்தக ஒப்பந்தத்தில், புதன்கிழமை ஒரு முக்கியமான காலக்கெடுவாகும்.
July 1-ஆம் திகதிக்குள், மூன்று நாடுகளைச் சேர்ந்த அதிகாரிகளும் CUSMA ஒப்பந்தத்தை 16 ஆண்டு காலத்திற்கு புதுப்பிக்க விரும்புகிறார்களா என்பது குறித்து ஏனைய நாடுகளுக்கு தெரிவிக்க வேண்டும்.
மூன்று தரப்பினரில் யாரேனும் ஒருவர் குறிப்பிட்ட கால நீட்டிப்புக்கு ஒப்புதல் வழங்க வில்லை என்றால், அடுத்த 10 ஆண்டுகளுக்கு வருடாந்த மறு ஆய்வு நடைமுறை அமுலுக்கு வரும்.
கனடா, Mexico ஆகிய நாடுகள் இந்த ஒப்பந்தத்தை 16 ஆண்டுகளுக்கு நீட்டிக்க விரும்புவதாக முறைப்படி அறிவித்துள்ள நிலையில், அமெரிக்காவின் நிலைப்பாடு இதுவரை தெளிவாக வெளியாகவில்லை.
இந்த நிலையில் அதிகாரப்பூர்வ காலக்கெடு நாளான புதனன்று முத்தரப்பு அதிகாரிகள் காணொளி வாயிலாக சந்திக்கவுள்ளனர்.
கடந்த February மாதம் அமெரிக்க ஜனாதிபதி Donald Trump, கனடாவிலிருந்து இறக்குமதி செய்யப்படும் பொருட்கள் மீது பரவலாக வரிகளை விதித்ததிலிருந்து, கனடாவும் அமெரிக்காவும் நீண்டகால வர்த்தகப் போரில் சிக்கியுள்ளன.
CUSMA ஒப்பந்தத்தின் கீழ் கனடியப் பொருட்களில் பெரும்பான்மையானவைக்கு இந்த வரிகளில் இருந்து விலக்கு அளிக்கப்பட்டிருந்தாலும், குறிப்பிட்ட சில துறைகளுக்கான சுங்க வரிகள் தொடர்ந்து நடைமுறையில் உள்ளன.
June மாத ஆரம்பத்தில் G7 தலைவர்கள் உச்சி மாநாட்டைத் தொடர்ந்து, CUSMA ஒப்பந்தத்தில் கையெழுத்திடாமல் அதை உடனடியாக இரத்து செய்வதையே தான் விரும்புவதாக Donald Trump கூறியிருந்தார்.
அதேவேளையில், அந்த ஒப்பந்தத்தில் தான் கையெழுத்திடக்கூடும் என்பதையும் அவர் சில சந்தர்ப்பங்களில் சுட்டிக்காட்டினார்.
கடந்த வாரம் தலைநகர் Ottawa-வில் செய்தியாளர்களிடம் பேசிய Mark Carney, அந்த ஒப்பந்தத்தை “நவீனமயமாக்க” அமெரிக்கா, Mexico ஆகிய நாடுகளுடன் இணைந்து செயல்படும் என்று கூறினார்.
இதன் மூலம் குறிப்பிட்ட ஒப்பந்தத்தில் மாற்றங்கள் வரக்கூடும் என்பதை மறைமுகமாக உணர்த்திய அவர், அமெரிக்காவிடம் இருந்து ஒரு மோசமான ஒப்பந்தத்தை ஏற்றுக் கொள்ளப் போவதில்லை எனவும் குறிப்பிட்டார்.
இந்த மூன்று நாடுகளில் எந்த ஒரு நாடும் ஆறு மாத கால முன்னறிவிப்புடன் இந்தத் திட்டத்திலிருந்து முழுமையாக விலகிக் கொள்ள முடியும்.
CUSMA ஒப்பந்தம் இல்லாமல் இருப்பது அமெரிக்காவிற்குச் சிறந்தது என Donald Trump முன்னர் கருத்து தெரிவித்திருந்த போதிலும், அந்த ஒப்பந்தத்தை இரத்து செய்ய வேண்டும் என்பதற்கான எந்த ஒரு அறிகுறியையும் அவரோ அல்லது அவரது உதவியாளர்களோ இதுவரை வெளிப்படுத்தவில்லை என்பது இங்கு குறிப்பிடத்தக்கது.
