Toronto நகர முதல்வர் பதவிக்கான போட்டி பிரதான இரண்டு வேட்பாளர்களிடையே கடும் போட்டியாக மாறக்கூடிய சாத்தியக்கூற்றை எதிர்வு கூறுகிறது.
இந்த ஆண்டு Toronto நகர முதல்வர் தேர்தலில் Olivia Chow, Brad Bradford இடையே கடும் போட்டி நிலவக்கூடும் என செவ்வாய்க்கிழமை (23) வெளியான ஒரு புதிய கருத்து கணிப்பு தெரிவிக்கிறது.
Toronto நகர முதல்வர் தேர்தல் October 26-ஆம் திகதி நடைபெறுகிறது.
இதில் Olivia Chow மீண்டும் போட்டியிடுகிறார்.
தவிரவும் நகர சபை உறுப்பினர் Brad Bradford நகர முதல்வர் பதவிக்கு போட்டியிட வேட்புமனு தாக்கல் செய்துள்ளார்.
Mainstreet Research கருத்துக் கணிப்பின்படி, இன்று தேர்தல் நடத்தப்பட்டால், முடிவெடுத்த வாக்காளர்களில் 43.6 சதவீதம் பேர் Olivia Chow-வுக்கு வாக்களிப்பார்கள் – Brad Bradford-க்கு 37.8 சதவீதத்தினர் வாக்களிப்பார்கள்.
தவிரவும் சுமார் 18.6 சதவிகிதத்தினர் தாங்கள் வேறு ஒரு வேட்பாளருக்கு வாக்களிக்கப் போவதாக தெரிவித்தனர்.
ஆனால் இருமுனை போட்டியில், பதிலளித்தவர்களில் 51.9 சதவீதம் பேர் Brad Bradford-க்கு வாக்களிப்பதாகவும், 48.1 சதவீதம் பேர் Olivia Chow-வுக்கு வாக்களிப்பதாகவும் கூறியுள்ளனர்.
சில மாதங்களுக்கு முன்னர், முன்னாள் நகர முதல்வர் John Tory ஒரு சாத்தியமான போட்டியாளராக இருந்ததோடு ஒப்பிடுகையில், Brad Bradford-டின் வெற்றி வாய்ப்புகளில் குறிப்பிடத்தக்க முன்னேற்றம் ஏற்பட்டுள்ளதாக இந்தக் கருத்துக் கணிப்பு சுட்டிக்காட்டுகிறது.
February மாதம் Mainstreet நடத்திய கருத்துக் கணிப்பில் Brad Bradford-க்கு 17 சதவிகித ஆதரவு மட்டுமே இருந்தது.
அதன் பின்னர், இந்த ஆண்டு தேர்தலில் போட்டியிடப் போவதில்லை என John Tory அறிவித்திருந்தார்.
Olivia Chow கிட்டத்தட்ட 6 சதவீத வாக்குகள் வித்தியாசத்தில் முன்னிலை வகித்தாலும், அவரது வாக்கு சதவீதம் 49 என்ற இலக்கத்தை நெருங்கினாலும், அதே எண்ணிக்கையிலான வாக்காளர்கள் தாங்கள் நிச்சயமாக அவருக்கு வாக்களிக்க போவதில்லை என கூறுகின்றனர்.
தற்போது 45 சதவீதத்தினர் மட்டுமே Brad Bradford-க்கு நிச்சயமாக வாக்களிப்போம் அல்லது பரிசீலிப்போம் என கூறுகின்றனர்.
ஆனால் குடியிருப்பாளர்களில் கால் பகுதியினர் மட்டுமே அவருக்கு நிச்சயமாக வாக்களிக்க மாட்டோம் என கூறுகின்றனர்.
பதிலளித்தவர்களில் சுமார் 45.7 சதவிகிதத்தினர் Olivia Chow-க்கு நிச்சயமாக வாக்களிக்க மாட்டோம் எனவும், 25.1 சதவிகிதத்தினர் Brad Bradford-க்கு நிச்சயமாக வாக்களிக்க மாட்டோம் எனவும் இந்த கருத்துக்கணிப்பில் தெரிவித்தனர்.
இந்த கருத்து கணிப்புக்கு பதிலளித்தவர்களில் வெறும் 40.8 சதவிகிதத்தினர் மட்டுமே Olivia Chow நகர முதல்வராக ஆற்றிவரும் பணியை அங்கீகரிக்கின்றனர் அல்லது முழுமையாக அங்கீகரிக்கின்றனர்.
இதற்கு மாறாக, 56 சதவிகிதத்தினர் அவர் ஆற்றிவரும் பணியை ஏற்கவில்லை அல்லது முழுமையாக ஏற்கவில்லை.
Toronto குடியிருப்பாளர்களில் 62.2 சதவீதம் பேர் நகரம் தவறான பாதையில் செல்வதாக உணர்வதும், 23.2 சதவீதம் பேர் மட்டுமே அது சரியான பாதையில் செல்வதாக உணர்வதும், இதற்கு 14.6 சதவீதம் பேர் உறுதியான பதில் தெரிவிக்கவில்லை என்பதும் இந்த கருத்துக்கணிப்பில் கவனம் பெறுகிறது.
இது Olivia Chow-க்கான மீள் தெரிவை சிக்கலாக்கும் பிரதான காரணியாக அமைகிறது.
இதுவரை ஒரு தமிழர் உட்பட மொத்தம் 23 பேர் Toronto நகர முதல்வர் பதவிக்கு வேட்புமனு தாக்கல் செய்துள்ளனர்.
இந்தத் தேர்தலுக்கான வேட்புமனு தாக்கல் August 21-ஆம் திகதி மாலை 2 மணியுடன் நிறைவடைகிறது.
