Ontario முதல்வர் Doug Ford, தனது செல்வாக்கு சரிந்து விட்டதாக கூறும் சமீபத்திய கருத்துக் கணிப்பை “போலியானது” என நிராகரித்தார்.
இன்று தேர்தல் நடத்தப்பட்டால், அவரும் அவரது தலைமையிலான PC கட்சியும் நான்காவது முறையாக “பெரும்பான்மை”யுடன் வெற்றி பெறுவார்கள் என அவர் செவ்வாய்க்கிழமை (16) கூறினார்.
“எனக்குத் தற்பெருமை பேசுவது பிடிக்காது” எனக் கூறிய அவர், இன்று ஒரு தேர்தல் நடத்தப்பட்டால், 41 சதவிகித ஆதரவில் உள்ள நாங்கள் மீண்டும் ஒருமுறை மிகப்பெரிய பெரும்பான்மையுடன் வெற்றி பெறுவோம் என Doug Ford நம்பிக்கை தெரிவித்தார்.
PC கட்சி, Doug Ford ஆகியோரின் செல்வாக்கு சரிந்து வருவதை காட்டும், பொதுவெளியில் வெளியிடப்பட்ட பல கருத்துக் கணிப்புகளை விட, தனது கட்சி, பிற நிறுவனங்களின் உள்ளக கருத்துக் கணிப்புகள் முற்றிலும் மாறுபட்ட வகையில் மக்கள் ஆதரவை எடுத்துக் காட்டுகிறது என அவர் கூறினார்.
Angus-Reid வெளியிட்ட சமீபத்திய கருத்துக் கணிப்பின்படி, Ontario வாக்காளர்களிடையே Doug Ford 21 சதவீத ஆதரவை பெற்றுள்ளார்.
இது கனடாவின் முதல்வர்களிடையே மிகக் குறைந்த ஆதரவு விகிதத்தையும், முதல்வராக அவர் பெற்றதிலேயே மிகக் குறைந்த ஆதரவு விகிதத்தையும் குறிக்கிறது.
செவ்வாயன்று ஒரு செய்தியாளர் இதுகுறித்து வினவியபோது, Doug Ford இந்தக் கருத்துக் கணிப்பின் நம்பகத்தன்மை மீது சந்தேகம் எழுப்பினார்.
“அவர்கள் இந்தப் போலியான கருத்துக் கணிப்பை வெளியிட, NDP, Liberal கட்சிகளின் உறுப்பினர்களிடம் கருத்துக்கணிப்பு நடத்துகிறார்கள்,” என முதல்வர் கூறினார்.
அந்த கருத்து கணிப்பின் வழிமுறையை அவர் கடுமையாக விமர்சித்தார்.
அவரது கட்சி அதன் உள்ளக கருத்துக் கணிப்புகளை பகிர்ந்து கொள்ளாத போதிலும், அவர்கள் மீண்டும் பெரும்பான்மை பெறுவது சாத்தியமே என Doug Ford கூறினார்.
Angus Reid நிறுவனத்தின் படி, இந்த இணையவழி கருத்து கணிப்பானது June 7 முதல் 11 வரை, சீரற்ற முறையில் தேர்ந்தெடுக்கப்பட்ட 4,076 கனடியர்களிடம் நடத்தப்பட்டது.
அதில் Ontario மாகாணத்தைச் சேர்ந்த 850 பேரும் அடங்குகின்றனர்.
Angus Reid நிறுவனம் செவ்வாயன்று வெளியிட்ட ஓர் அறிக்கையில், தனது கருத்துக் கணிப்பு முடிவுகளை நியாயப்படுத்தியது.
ஒரு தசாப்தத்திற்கும் மேலாக மாகாண முதல்வர்களின் செயல்திறன் அங்கீகாரத்தை “பயமோ பாரபட்சமோ இன்றி” காலாண்டு அடிப்படையில் தாம் அளவிட்டு வருவதாக Angus Reid அந்த அறிக்கையில் கூறியது.
ஏனைய சமீபத்திய கருத்துக் கணிப்புகள் மாறுபட்ட முடிவுகளைக் காட்டி நிற்கின்றன.
சில கருத்து கணிப்புகள் Doug Ford, அவரது தலைமையிலான PC கட்சி போட்டியாளரான Liberal கட்சியினரிடம் பின்னடைவைச் சந்திப்பதாகக் காட்ட, ஏனையவை மிகவும் சாதகமான ஒரு நிலையை சுட்டிக்காட்டுகின்றன.
மூன்று வாரங்களுக்கு முன்னர் வெளியிடப்பட்ட Abacus Data கருத்துக் கணிப்பின்படி, இன்று தேர்தல் நடத்தப்பட்டால் PC கட்சி 41 சதவீத வாக்குகளைப் பெறும் என தெரிவித்தது.
அந்த கருத்துக்கணிப்பில் Liberal கட்சிக்கு ஆதரவு 31 சதவீதமாகவும், NDP கட்சிக்கு 17 சதவீதமாகவும் இருந்தது.
அதே கருத்துக் கணிப்பு Doug Ford கொண்டுள்ள ஆதரவு விகிதத்தை 37 சதவீதமாக மதிப்பிட்டது.
April மாத இறுதியில் Liaison Strategies வெளியிட்ட ஒரு கருத்துக் கணிப்பின்படி, அந்த நேரத்தில் தேர்தல் நடத்தப்பட்டால், PC கட்சிக்கு (36 சதவீதம்) Liberal கட்சிக்கும் (38 சதவீதம்) இடையிலான வாக்கு வித்தியாசம் வெறும் இரண்டு புள்ளிகளாக மட்டுமே இருக்கும் என தெரியவந்தது.
அதே கருத்து கணிப்பில் Doug Ford கொண்டிருந்த ஆதரவு விகிதம் 27 சதவீதமாக இருந்தது கண்டறியப்பட்டது.
Doug Ford ஒரு தனியார் விமானத்தை கொள்வனவு செய்தது தொடர்பான சர்ச்சையைத் தொடர்ந்து இந்தக் கருத்துக் கணிப்பு வெளியானது குறிப்பிடத்தக்கது.
