Toronto, Vaughan நகர யூத வழிபாட்டு தலங்கள் மீதான துப்பாக்கிச் சூட்டுச் சம்பவம் குறித்த விசாரணையில் ஒருவர் கைது செய்யப்பட்டார்.
March மாதம் நிகழ்ந்த இரண்டு யூத வழிபாட்டு தலங்கள் மீது நடத்தப்பட்ட துப்பாக்கிச் சூடு தொடர்பாக தேடப்பட்டு வந்த 18 வயது இளைஞர் கைது செய்யப்பட்டுள்ளார்.
Toronto காவல்துறை புதன்கிழமை (06) வெளியிட்ட ஒரு அறிக்கையில் இந்தக் கைது அறிவிக்கப்பட்டது.
சந்தேக நபரின் புகைப்படத்தை வெளியிட நீதிமன்றத்தின் அனுமதி பெற்ற ஒரு வாரத்தின் பின்னர் இந்த கைது மேற்கொள்ளப்பட்டுள்ளது.
சந்தேக நபர் 18 வயதானவராக இருந்தாலும், குறிப்பிட்ட இரண்டு சம்பவங்கள் நடந்தபோது அவருக்கு 17 வயது என்பதால், அவரது பெயரை வெளியிடவில்லை என காவல்துறை தெரிவித்துள்ளது.
இதில் முதலாவது துப்பாக்கிச் சூட்டுச் சம்பவம் Vaughan நகரில் March 6 ஆம் திகதி நள்ளிரவுக்கு சற்று முன்னர் Clark Avenue West – York Hill Boulevard பகுதியில் நிகழ்ந்தது.
சம்பவத்தின்போது யூத வழிபாட்டு தலத்திற்குள் இருந்த இருவருக்கும் காயம் ஏற்படவில்லை என காவல்துறை தெரிவித்தது.
சுமார் 20 நிமிடங்கள் கழித்து, Toronto நகரில் Bathurst Street – Glencairn Avenue பகுதியில் உள்ள யூத வழிபாட்டு தலம் துப்பாக்கி சூட்டுக்கு இலக்கானது.
இதில் கைது செய்யப்பட்ட சந்தேக நபர், மொத்தம் 9 குற்றச்சாட்டுகளை எதிர்கொள்கிறார்.
சந்தேக நபர் “தனியாகச் செயல்படவில்லை” என புலனாய்வாளர்கள் நம்புவதாக காவல்துறை கடந்த வாரம் தெரிவித்தது.
ஆனால், வேறு எத்தனை பேர் இதில் சம்பந்தப்பட்டிருக்கலாம் என்பதைக் கண்டறிய விசாரணைகள் தொடர்வதாக காவல்துறையினர் தெரிவிக்கின்றனர்.
Toronto காவல்துறைக்கும் York பிராந்திய காவல்துறைக்கும் இடையிலான கூட்டாண்மையின் விளைவாக இந்த கைது சாத்தியமானது என Toronto காவல்துறை தலைவர் Myron Demkiw கூறினார்.
இதில் சந்தேக நபரைக் கைது செய்ததற்காக Vaughan நகர முதல்வர் Steven Del Duca இரண்டு காவல் துறைகளுக்கும் நன்றி தெரிவித்தார்.
