கனடாவின் 9 மாகாணங்கள், 2 பிரதேசங்களில் வானிலை எச்சரிக்கைகள் அமுலில் உள்ளன.
40 cm வரை பனிப்பொழிவு -55 குளிர், என நாட்டின் பெரும்பகுதி வானிலை எச்சரிக்கையின் கீழ் உள்ளது.
பல பகுதிகளில் கனமழை, கடுமையான குளிர், பனிப்பொழிவு ஏற்படும் என சுற்றுச்சூழல் கனடா எச்சரித்துள்ளது.
Ontario மாகாணத்தில் ஞாயிற்றுக்கிழமை (14) காலை நிலவரப்படி, மொத்தம் 17 வானிலை எச்சரிக்கைகள் அமுலில் இருந்தன.
இவற்றில் பெரும்பாலானவை London நகரம் முதல் Tobermory வரையிலும், Barrie முதல் Goderich வரையிலும் பரவியிருக்கும் பனிப்பொழிவுகளையும் உள்ளடக்கியுள்ளது.
Quebec மாகாணத்தின் ஒரு பகுதி மஞ்சள் குளிர்கால புயல் எச்சரிக்கையின் கீழ் உள்ளது.
ஞாயிறு இரவு முதல் திங்கட்கிழமை (15) வரை சில இடங்களில் ஆபத்தான குளிர்கால நிலைமைகள் இருக்கும் என முன்னறிவிப்பு தெரிவிக்கிறது.
கிழக்கு மாகாண Newfoundland and Labrador-ரில் பலத்த காற்று வீசும் எனவும், சில இடங்களில் 30 cm வரை பனிப்பொழிவு ஏற்பட வாய்ப்புள்ளதாகவும் எச்சரிக்கைகள் உள்ளன.
P.E.I. , Nova Scotia மாகாணங்களில் சில பகுதிகளும் மஞ்சள் குளிர்கால புயல் அல்லது பனிப்பொழிவு எச்சரிக்கையின் கீழ் உள்ளன.
அங்கு சில பகுதிகளில் மொத்த பனிப்பொழிவு 40 cm வரை இருக்கலாம் எனவும், காற்று மணிக்கு 90 km வேகத்தில் வீசும் எனவும் எச்சரிக்கப்படுகிறது.
மேற்கு மாகாணங்களில், Winnipeg பகுதியை உள்ளடக்கிய தெற்கு Manitoba-வின் ஒரு பெரிய பகுதியில் வசிப்பவர்களுக்கு ஞாயிறு கடுமையான குளிர் நிலை இருக்கும் என எச்சரிக்கப்பட்டுள்ளது.
Alberta மாகாணத்தில் காற்று முதல் உறைபனி மழை, பனிப்பொழிவு வரை மஞ்சள் எச்சரிக்கை விடுக்கப்பட்டுள்ளது.
இதே எச்சரிக்கைகள் Edmonton உள்ளிட்ட மாகாணத்தின் சில பகுதிகளுக்கும், British Colombia, Saskatchewan எல்லைகளின் சில பகுதிகளுக்கும் வழங்கப்பட்டுள்ளன.
மேற்கில் மழைப்பொழிவு தொடர்ந்து ஒரு சவாலாக உள்ளது.
தெற்கு British Colombia-வின் சில பகுதிகளுக்கு மழை எச்சரிக்கைகள் நடைமுறையில் உள்ளன.
கனடாவின் வடக்கில், சுற்றுச்சூழல் கனடாவின் முன்னறிவிப்பாளர்கள் பனிப்பொழிவு, உறைபனி மழையை எதிர்பார்க்கின்றனர்.
Yukon-னின் சில பகுதிகளுக்கு மஞ்சள் எச்சரிக்கை நடைமுறையில் உள்ளது.
அங்கு கடும் காற்றினால், -50 முதல் -55 வரை குளிர் நிலை உணரக்கூடும் என எச்சரிக்கப்படுகிறது.
வடமேற்கு பிரதேசங்களில் இரண்டு வானிலை எச்சரிக்கைகள் Beaufort கடலோரப் பகுதிகளில் பனிப்புயல் நிலைமைகள் குறித்து தெரிவிக்கின்றன.
ஞாயிறு காலை 8:30 நிலவரப்படி New Brunswick, Saskatchewan , Nunavut பகுதிகளுக்கு எந்த வானிலை எச்சரிக்கையும் வெளியிடப்படவில்லை.
LJI Reporter ரம்யா சேது
