வரவு செலவுத் திட்டம் மீதான முதல் நம்பிக்கை வாக்கெடுப்பில் Mark Carney அரசாங்கம் வெற்றியடைந்தது.
பிரதமர் Mark Carney அரசின் முதலாவது வரவு செலவு திட்டத்தை நிதி அமைச்சர் François-Philippe Champagne செவ்வாய்க்கிழமை (04) சமர்பித்தார்.
இந்த வரவு செலவுத் திட்டம் மீதான முதலாவது நம்பிக்கை வாக்கெடுப்பில் சிறுபான்மை Liberal அரசாங்கம் வெற்றி பெற்றது.
வியாழக்கிழமை (06) இரவு நடைபெற்ற வரவு செலவுத் திட்டத்துடன் தொடர்புடைய தொடர்ச்சியான வாக்கெடுப்புகளில் முதலாவது வாக்கெடுப்பில் பிரதமர் Mark Carney தலைமையிலான அரசாங்கம் முதல் முறையாக வெற்றி பெற்றது.
Pierre Poilievre தலைமையிலான Conservative கட்சி, துணைத் திருத்தத்தின் மூலம் அரசாங்கத்தின் வரவு செலவுத் திட்டத்தை நிராகரிக்க அழைப்பு விடுத்தது.
வழக்கமான நடைமுறை முன்மொழிவுகள் கொண்ட இந்த துணைத் திருத்த வாக்கெடுப்பை நம்பிக்கை வாக்கெடுப்பாக மாற்றுவதாக அரசாங்க அவைத் தலைவர் Steven MacKinnon அலுவலகம் வாக்கெடுப்புக்கு சில மணி நேரங்களுக்கு முன்னர் அறிவித்தது பரபரப்பை ஏற்படுத்தியது.
வாக்கெடுப்பில் தோல்வி அடைந்தால் அரசாங்கம் கவிழும் என்ற நிலையில் இந்த நம்பிக்கை வாக்கெடுப்பில் 198-க்கு 139 என்ற வாக்குகளால் Mark Carney அரசாங்கம் வெற்றியடைந்தது.
இதில் நிதியமைச்சரின் பொருளாதாரத் திட்டங்களை நிராகரிக்க Conservative கட்சி மேற்கொண்ட முயற்சியை Liberal, NDP, Bloc Quebecois, பசுமை கட்சி நாடாளுமன்ற உறுப்பினர்கள் இணைந்து தோற்கடித்தனர்.
ஏழு உறுப்பினர்களை கொண்ட NDP இந்த தீர்மானத்திற்கு எதிராக வாக்களிக்கும் என இடைக்கால NDP தலைவர் Don Davies அறிவித்தது அரசாங்கம் வாக்களிப்பால் கவிழ்க்கப்படுமா என்பது குறித்த சந்தேகம் கலைந்தது.
இந்த நிலையில் வரவு செலவுத் திட்டம் மீதான Bloc Quebecois கட்சியின் துணைத் திருத்தம் வெள்ளிக்கிழமை (07) பிற்பகல் வாக்கெடுப்புக்கு வருகிறது.
இந்த வாக்கெடுப்பையும் நம்பிக்கை வாக்கெடுப்பாக மாற்ற அரசாங்கம் முடிவு செய்துள்ளது.
இந்த இரண்டு திருத்தங்களையும் நம்பிக்கை வாக்கெடுப்புகளாக மாற்ற பிரதமர் Mark Carney தீர்மானித்ததாக அரசாங்க அவைத் தலைவரின் செய்தித் தொடர்பாளர் வியாழக்கிழமை கூறினார்.
இந்த துணைத் திருத்தை ஆதரிப்பதா அல்லது மீண்டும் அரசாங்கத்துடன் இணைந்து வாக்களிப்பதா என்பதை இதுவரை முடிவு செய்யவில்லை என NDP தலைவர் கூறினார்.
அரசாங்கம் நம்பிக்கை வாக்கெடுப்பில் தோற்றால், அது பொதுவாக ஒரு தேர்தலைத் தூண்டும் சாத்தியக்கூறு உள்ளது குறிப்பிடத்தக்கது.
