எதிர்க்கட்சி உறுப்பினர்கள் சிலர் Liberal கட்சியில் இணையலாம் என தெரியவருகிறது.
Conservative கட்சியில் இருந்து விலகிய Nova Scotia நாடாளுமன்ற உறுப்பினர் Chris d’Entremont, Liberal அரசாங்கத்தில் செவ்வாய்க்கிழமை (04) இணைந்தார்.
அவர் தனது புதிய கட்சியினால் திறந்த மனதுடன் வரவேற்கப்பட்டார்.
புதன்கிழமை (05) தனது முதலாவது Liberal கட்சியின் நாடாளுமன்ற உறுப்பினர் கூட்டத்தில் கலந்து கொண்ட அவருக்கு பெரும் வரவேற்பு வழங்கப்பட்டது.
Liberal கட்சி பெரும்பான்மை அரசாங்கத்திற்கு மூன்று வாக்குகள் குறைவாக இருந்த நிலையில், இந்த கட்சி மாற்றம் அந்த எண்ணிக்கை இரண்டாக குறைந்துள்ளது.
அரசியல் பெரும் அதிர்ச்சியை ஏற்படுத்திய தனது கட்சி மாற்ற அறிவித்தலின் மறுநாள் காலை பிரதமர் கலந்து கொண்ட பொது போக்குவரத்து குறித்த அறிவிப்பு நிகழ்வில் Chris d’Entremont பங்கேற்றார்.
அங்கு எதிர்க்கட்சி நாடாளுமன்ற உறுப்பினர்களை Liberal கட்சிக்கு ஈர்க்கும் முயற்சிகளில் பிரதமரின் ஈடுபட்டு குறித்து செய்தியாளர்களின் கேள்விகளை Mark Carney எதிர்கொண்டார்.
Chris d’Entremont-டை தனது கட்சிக்கு வரவேற்ற பிரதமர், இந்த முக்கியமான தருணத்தில் அரசாங்கத்துடன் இணைய அவர் எடுத்த முடிவு மிகவும் மதிப்புமிக்கது, முக்கியமானது என கூறினார்.
மேலும் சிலர் இவ்வாறு கட்சி மாறும் சாத்தியக்கூறு உள்ளது எனவும் Mark Carney தெரிவித்தார்.
இந்த முடிவு அனைத்து நாடாளுமன்ற உறுப்பினர்களுக்கும் ஒரு செய்தியாக அமைய வேண்டும் எனவும் பிரதமர் தெரிவித்தார்.
Chris d’Entremont கட்சி மாறும் முடிவை எடுப்பதற்கு முன்னதாக அவருடன் தான் பேசியதையும் பிரதமர் உறுதிப்படுத்தினார்.
இந்த கட்சி மாற்றம் Conservative உறுப்பினர்கள் சிலரிடமிருந்து கடுமையான விமர்சனத்தை தூண்டியுள்ளது.
ஆனாலும் செய்தியாளர்களிடம் பேசிய Chris d’Entremont, ஏனைய Conservative நாடாளுமன்ற உறுப்பினர்கள் சிலரும் தன்னைப் போலவே உணரக்கூடும் என தெரிவித்தார்.
வரவு செலவுத் திட்ட வாக்கெடுப்புக்கு முன்னர், கட்சி மாறுவது குறித்து அல்லது சுயேச்சை உறுப்பினர்களாக நாடாளுமன்றத்தில் அமர்வது குறித்து பல Conservative நாடாளுமன்ற உறுப்பினர்களுடன் கலந்துரையாடி வருவதாக Liberal கட்சி வட்டாரங்கள் தெரிவிக்கின்றன.
ஆனாலும் அவர்களின் விபரங்களை எவரும் வெளியிடவில்லை.
எதிர்க்கட்சியைச் சேர்ந்த நாடாளுமன்ற உறுப்பினர்கள் சிலர் Liberal கட்சியில் இணைவது குறித்து ஆலோசித்து வருவதாக அரசியல் மட்டத்தில் பல வாரங்களாக வதந்திகள் பரவி வருகின்றன.
அவர்களில் ஒருவராக தான் இருக்கலாம் என்ற ஊகங்களை தணிக்கும் முயற்சியில், Conservative நாடாளுமன்ற உறுப்பினர் Dominique Vien புதன்கிழமை ஒரு ஒளிப்பதிவை வெளியிட்டார்.
அதில் Conservative கட்சி மீதான தனது உறுதிப்பாட்டை மீண்டும் உறுதிப்படுத்திய அவர், கட்சியை விட்டு வெளியேறும் எண்ணம் இல்லை எனவும் கூறினார்.
இந்த கட்சி மாற்றத்தை அடுத்து, சிறுபான்மை Liberal அரசாங்கம் ஏனைய Conservative நாடாளுமன்ற உறுப்பினர்களை தமது கட்சியின் பக்கம் அழைத்து வர முயன்று வருவதாக தெரியவருகிறது.
343 நாடாளுமன்ற உறுப்பினர்களை கொண்ட நாடாளுமன்றத்தில், Liberal கட்சி 170 ஆசனங்களை கொண்டுள்ளது குறிப்பிடத்தக்கது.
இது பெரும்பான்மைக்கு இரண்டு ஆசனங்கள் குறைவானது என்பது குறிப்பிடத்தக்கது.
