கனடாவின் சுதந்திரத்திற்காகவும், உலக அமைதிக்காகவும் தமது இன்னுயிர்களை தியாகம் செய்த படை வீரர்களை நினைவு கூறும் வகையில், நாடு தழுவிய ரீதியில் நினைவேந்தல் தினம் புதன்கிழமை (11) மிகுந்த உணர்வுபூர்வமாக அனுசரிக்கப்பட்டது.
தலைநகர் Ottawa-வில் உள்ள தேசிய போர் நினைவிடத்தில் நடைபெற்ற பிரதான நிகழ்வில் 35,000-க்கும் மேற்பட்ட மக்கள் நேரடியாக கலந்து கொண்டு தமது அஞ்சலியைச் செலுத்தினர்.
காலை 11:00 மணியளவில் 21 குண்டுகள் முழங்க, The Last Post இசைக்கப்பட்டு, நாடு முழுவதும் இரண்டு நிமிட மௌன அஞ்சலி செலுத்தப்பட்டது.
உயிர்நீத்த வீரர்களுக்கு மரியாதை செலுத்தும் விதமாக, Royal கனடிய விமானப்படையின் இரண்டு விமானங்களும், RCMP Black Hawk உலங்குவானூர்திகளும் வானில் பறந்து அஞ்சலி செலுத்தின.
Royal கனடியன் Legion அமைப்பின் 100-வது ஆண்டு நிறைவையும், ஆப்கானிஸ்தான் யுத்தம் ஆரம்பித்து 25 ஆண்டுகள் நிறைவடைவதையும் நினைவுகூரும் வகையில் அமைந்த நிகழ்வில், நினைவேந்தல் உறுதிமொழி ஆங்கிலம், பிரெஞ்சு, முதற்குடியினர் மொழியான Ojibwe ஆகியவற்றில் வாசிக்கப்பட்டது.
Ottawa-வில் நடைபெற்ற தேசிய நிகழ்வில் கனடாவின் உயர்மட்ட அரசியல் தலைவர்கள், பிரமுகர்கள் பலர் கலந்து கொண்டு மலர் வளையம் வைத்து அஞ்சலி செலுத்தினர்.
பிரதமர் Mark Carney, தனது துணைவியாருடன் நிகழ்வில் பங்கேற்று தேசிய போர் நினைவிடத்தில் மலர் வளையம் வைத்து மரியாதை செலுத்தினார்.
அதிகரித்து வரும் ஆபத்தானதும் பிளவுபட்ட துமான உலகில், நினைவேந்தல் என்பது வெறும் நன்றியுணர்வு மட்டுமல்ல, அது விழிப்புணர்வின் உறுதியின் வெளிப்பாடாகும் என அவர் தனது செய்தியில் குறிப்பிட்டார்.
ஆளுநர் நாயகமும் முப்படைகளின் தளபதியுமான மாண்புமிகு Louise Arbour, Royal கனடிய கடற்படைச் சீருடையில் கலந்துகொண்டு படைவீரர்களின் அணிவகுப்பு மரியாதையை ஏற்றுக் கொண்டு மலர் வளையம் வைத்து அஞ்சலி செலுத்தினார்.
பிரதான எதிர்க்கட்சி தலைவரான Pierre Poilievre, கடந்த மாதம் Alberta CFB Wainwright இராணுவப் பயிற்சி முகாமில் ஏற்பட்ட தீ விபத்தில் உயிரிழந்த நான்கு வீரர்களுக்கு அஞ்சலி செலுத்தும் வகையில், அங்கு நடைபெற்ற விசேட நினைவேந்தல் நிகழ்வில் கலந்து கொண்டார்.
Ottawa நிகழ்வில் படைவீரர் நலத்துறை அமைச்சரும், தேசிய பாதுகாப்பு இணை அமைச்சருமான Jill McKnight, நாடாளுமன்ற சபாநாயகர் Francis Scarpaleggia, மேல் சபை சபாநாயகர், பாதுகாப்புப் படைகளின் தலைமை தளபதி Gen. Jennie Carignan, Royal கனடியன் Legion தலைவர் Sharon McKeown ஆகியோர் பங்கேற்றனர்.
தவிரவும் நாடளாவிய ரீதியில் நடைபெற்ற நினைவேந்தல் நிகழ்வுகளில் மத்திய, மாகாண, நகர சபை அரசியல் தலைவர்கள் பலரும் பங்கேற்றனர்.
