Toronto நகரில் நான்கு நாட்களாக தொடர்ந்து நடைபெற்ற உலகத் தமிழ் ஆய்வு மாநாடு வெற்றிகரமாக நிறைவடைந்தது.
இந்த வரலாற்றுச் சிறப்புமிக்க ஆய்வு மாநாட்டை அனைத்துலகத் தமிழர் பேரவை (FGT – Federation of Global Tamils) ஒருங்கிணைத்தது.
வியாழக்கிழமை (15) ஆரம்பமான இந்த மாநாடு, ஞாயிற்றுக்கிழமை (18) வரை 4 நாட்கள் நடைபெற்றது.
இந்த சர்வதேச மாநாட்டில், உலகெங்கிலும் உள்ள தமிழ் அறிஞர்கள், தொழில்நுட்ப வல்லுநர்கள், ஆய்வாளர்கள் பெருமளவில் பங்கேற்றனர்.
இந்த மாநாடு, “செயற்கை நுண்ணறிவு யுகத்தில் செவ்வியல் தமிழும் தமிழர்களும்” என்ற மிக முக்கிய தற்காலக் கருப்பொருளை மையமாக கொண்டு நடத்தப்பட்டது.
இந்த சர்வதேச மாநாட்டிற்கு உலகம் முழுவதிலுமிருந்து சுமார் 497 ஆய்வுச் சுருக்கங்கள் பெற பட்டிருந்தன.
அவற்றில் தீவிரப் பரிசீலனைக்குப் பிறகு தகுதிவாய்ந்த 105 கட்டுரைகள் மாநாட்டில் சமர்ப்பிக்கத் தேர்வு செய்யப்பட்டன.
இந்த மாநாட்டில் இந்தியா, இலங்கை உள்ளிட்ட 13-க்கும் மேற்பட்ட நாடுகளைச் சேர்ந்த தமிழ் அறிஞர்கள் கலந்து கொண்டனர்.
குறிப்பாக, இலங்கையின் யாழ்ப்பாண பல்கலைக்கழகம், வவுனியா பல்கலைக்கழகம், கிழக்குப் பல்கலைக்கழகம் ஆகிய முன்னணி கல்வி நிறுவனங்கள் இந்த மாநாட்டில் அதிகாரப்பூர்வமாக இணைந்திருந்தன என்பது குறிப்பிடத்தக்கது.
வியாழன் நடைபெற்ற ஆரம்ப நிகழ்வைத் தொடர்ந்து, 17-ஆம் திகதி வரை 3 நாட்களுக்கு தொடர்ச்சியாக ஆய்வுக் கட்டுரைகள் சமர்ப்பிப்பு, கலந்துரையாடல்கள் Scarborough நகரில் உள்ள Centennial கல்லூரி நிகழ்வு மையத்தில் நடைபெற்றது.
சனிக்கிழமை (17) இரவு பிரம்மாண்ட கலை இரவு தமிழர்களின் கலை, பாரம்பரிய இசை, கலாச்சாரத்தை போற்றும் வகையில் நடைபெற்றது.
மாநாட்டின் இறுதி நாளான ஞாயிறன்று FGT வருடாந்த விருந்தும் விருதும் இரவு நிகழ்வு நடைபெற்றது.
உலகத் தமிழர்களை ஒரே குடையின் கீழ் இணைத்து, தமிழின் தொன்மையையும் நவீன தொழில்நுட்பத்தையும் இணைப்பதில் இந்த மாநாடு ஒரு வரலாற்று மைல்கல்லாக அமைந்துள்ளது என நிறைவுரையில் அதன் ஒருங்கிணைப்பாளர்கள் பெருமிதத்துடன் தெரிவித்துள்ளனர்.
