Toronto நகர முதல்வர் பதவிக்கான தேர்தலில் இருந்து முன்னாள் அமைச்சர் Chris Alexander விலகியுள்ளார்.
தனது தேர்தல் பிரச்சாரத் தலைமையகத்தில் அவசரமாக நடத்திய செய்தியாளர் சந்திப்பில் செவ்வாய்க்கிழமை இம்முடிவை அவர் அதிகாரப்பூர்வமாக அறிவித்தார்.
முன்கூட்டிய வாக்குப்பதிவு செவ்வாய் காலை திறக்கப்பட்டுள்ள நிலையில், இவரது இந்த திடீர் முடிவு தேர்தல் களத்தில் ஒரு மிகப்பெரிய அரசியல் திருப்புமுனையை ஏற்படுத்தியுள்ளது.
இந்தத் தேர்தலில் வெற்றி பெறுவதற்கான வாய்ப்புகள் இல்லை என்பதை உணர்ந்தே தேர்தலில் இருந்து விலகியதாக முன்னாள் Conservative அமைச்சரான Chris Alexander குறிப்பிட்டுள்ளார்.
செவ்வாய் காலை வெளியான பிரத்யேக Nanos Research கருத்துக்கணிப்புப் புள்ளிவிவரங்கள் இவரைப் பெரும் பின்னடைவுக்கு தள்ளியது.
இதில் முடிவெடுத்த வாக்காளர்கள் மத்தியில் தற்போதைய நகர முதல்வர் Olivia Chow 52.4 சதவீத ஆதரவுடனும், Brad Bradford 42.6 சதவீத ஆதரவுடனும் முன்னிலையில் இருக்க, Chris Alexander வெறும் 4 சதவீத ஆதரவை மட்டுமே பெற்று மூன்றாவது இடத்தில் மிகவும் பின்தங்கிய இருந்தார்.
முன்கூட்டிய வாக்குப்பதிவு ஆரம்பிக்கும் இந்தத் தருணத்தில், Toronto வாக்காளர்கள் இறுதிவரை களத்தில் இருக்கக்கூடிய ஒரு தகுதியான வேட்பாளருக்கு தங்களது வாக்குகளைச் செலுத்த ஏதுவாக நான் போட்டியில் இருந்து விலகும் இந்த கடினமான, யதார்த்தமான முடிவை எடுத்துள்ளேன் என செய்தியாளர்களிடம் பேசிய Chris Alexander கூறினார்.
ஆனாலும் களத்தில் எஞ்சியுள்ள பிரதான வேட்பாளர்கள் Olivia Chow, Brad Bradford ஆகிய இருவரில் எவருக்கும் தான் ஆதரவளிக்கப் போவதில்லை எனவும் அவர் தெளிவுபடுத்தியுள்ளார்.
தனது கொள்கைகளுடன் எந்தவொரு வேட்பாளரும் முழுமையாக ஒத்துப்போகவில்லை என்பதே இதற்குக் காரணம் என Chris Alexander செய்தியாளர் சந்திப்பில் தெரிவித்தார்.
Chris Alexander தற்போது தனது பிரச்சாரத்தை முடக்கிக் கொண்டாலும், October 26 அன்று நடைபெறும் இறுதி வாக்குப்பதிவு சீட்டுகளில் அவரது பெயர் தொடர்ந்து அச்சடிக்கப்பட்டு நீடிக்கும் என்பது குறிப்பிடத்தக்கது.
