கனடாவின் மிகப்பெரிய தனியார் ஆங்கில மொழிப் பாடசாலைகளில் ஒன்றான International Language Academy of Canada (ILAC) தனது செயல்பாடுகளை முழுமையாக நிறுத்தியது.
ILAC திவால் நிலைக்கு (Bankruptcy) விண்ணப்பித்துள்ளது.
கடந்த மூன்று ஆண்டுகளாக இந்தத் துறையில் ஏற்பட்ட கடுமையான நிதி நெருக்கடிகள், அரசு முன்னெடுத்த புதிய விதிமுறை மாற்றங்கள் காரணமாக இந்த அதிரடி முடிவு எடுக்கப்பட்டுள்ளதாக ILAC தெரிவித்துள்ளது.
இந்த நிறுவனத்தின் சொத்துக்கள், நிதி விவகாரங்களை மேலாண்மை செய்ய பிரபல தணிக்கை நிறுவனமான KPMG திவால் அறங்காவலராக (Insolvency Trustee) நியமிக்கப்பட்டுள்ளது.
1997-ஆம் ஆண்டு ஆரம்பிக்கப்பட்ட ILAC என்ற இந்த உலகத்தரம் வாய்ந்த கல்வி நிறுவனம், Toronto, Vancouver ஆகிய இரு முக்கிய நகரங்களில் பெரிய வளாகங்களை கொண்டு இயங்கி வந்தது.
இந்த திடீர் நகர்வினால் அங்கு கல்வி பயின்று வரும் ஏராளமான சர்வதேச மாணவர்கள் தங்களது எதிர்காலம் குறித்து கவலை அடைந்துள்ளனர்.
அவர்களுக்கு இந்த இக்கட்டான சூழ்நிலையில் தேவையான உதவிகளை வழங்க ஒழுங்குமுறை அமைப்புகளுடன் இணைந்து செயல்பட்டு வருவதாக பாடசாலை நிர்வாகம் கூறியுள்ளது.
கடந்த 2024-ஆம் ஆண்டு கனடிய மத்திய அரசு சர்வதேச மாணவர் விசாக்களுக்கு (Study Permits) தற்காலிக கட்டுட்டை விதித்தது.
இந்த கட்டுப்பாடுகள் காரணமாக, கனடாவில் சர்வதேச மாணவர்களின் எண்ணிக்கை தற்போது மூன்றில் ஒரு பங்காகக் குறைந்துள்ளதாக கனடிய குடியுரிமை, குடிவரவுத் துறை (IRCC) தெரிவித்துள்ளது.
2026-ஆம் ஆண்டிற்கான மொத்த சர்வதேச மாணவர் சேர்க்கை இலக்கு 1,55,000 ஆக நிர்ணயிக்கப்பட்டிருந்தது.
ஆனால், இந்த ஆண்டின் முதல் ஆறு மாதங்களில் வெறும் 22,405 மாணவர்கள் மட்டுமே கனடாவுக்கு வந்துள்ளனர்.
இது நிர்ணயிக்கப்பட்ட இலக்கை விட மிகக் குறைவாகும்.
மாணவர் சேர்க்கையில் ஏற்பட்டுள்ள இந்த கடுமையான வீழ்ச்சி காரணமாக, Ontario மாகாணத்தில் உள்ள பல முன்னணி பொதுக் கல்லூரிகள் தங்களது கல்வித் திட்டங்களை தற்காலிகமாக நிறுத்தி வைத்துள்ளன.
இதன் மூலம் கல்வி நிறுவனங்களின் வருவாய் பெருமளவில் பாதிக்கப்பட்டுள்ளதால், வேறு வழியின்றி தங்களது பேராசிரியர்கள், கல்விப் பணியாளர்களை கல்லூரிகள் அதிரடியாகப் பணிநீக்கம் செய்து வருகின்றன.
