கனடா மீதான தனது புதிய வரிகள் குறித்து அமெரிக்க ஜனாதிபதி விரைவில் தனது நிலைப்பாட்டை மாற்றிக் கொள்வார் என நம்புவதாக California ஆளுநர் தெரிவித்தார்.
கனடா, அமெரிக்கா இடையிலான வர்த்தக பேச்சுவார்த்தைகள் முறிந்த நிலையில் California ஆளுநரின் இந்தக் கருத்து வெளியானது.
வரிகள் விடயத்தில், உள்நாட்டில் அதிகரித்து வரும் அரசியல் அழுத்தத்தை எதிர்கொண்டுள்ள Donald Trump விரைவில் தனது நிலைப்பாட்டை மாற்றிக் கொள்வார் என நம்புவதாக California ஆளுநர் Gavin Newsom தெரிவித்துள்ளார்.
Donald Trump தனது சொந்தக் கட்சியினரிடம் இருந்து பெறுகின்ற தொலைபேசி அழைப்புகள் குறித்து சிந்தித்துப் பாருங்கள் என கனடிய செய்தி ஊடகம் ஒன்றுக்கு வழங்கிய செவ்வியில் Gavin Newsom கூறினார்.
அதிகபட்சம் சில வாரங்களிலோ அல்லது சில நாட்களிலோ, அவர் இதில் தனது நிலைப்பாட்டை முழுமையாக மாற்றிக்கொண்டு, பின்னர் தன் மானத்தைக் காப்பாற்றிக் கொள்ள முயற்சிப்பார் என நம்புவதாக California ஆளுநர் தெரிவித்தார்.
குடியரசுக் கட்சியின் உறுப்பினர்களுக்கு Donald Trump “அதிகமான அரசியல் அழுத்தத்தை” ஏற்படுத்துவதாக ஜனநாயகக் கட்சியைச் சேர்ந்த Gavin Newsom கூறுகிறார்.
பல வாரங்களாக நடைபெற்ற தீவிர பேச்சுவார்த்தைகளுக்கு பின்னரும், கனடாவும் அமெரிக்காவும் வெள்ளிக்கிழமை (21) இரவு இறுதி நேர வர்த்தக ஒப்பந்தத்தை எட்டத் தவறின.
அமெரிக்கா முன்மொழிந்த நிபந்தனைகளில் செய்யப்பட்ட இறுதி நேர மாற்றங்கள் இதற்குக் காரணம் என Mark Carney குற்றம் சாட்டியிருந்தார்.
இதன் காரணமாக சுமார் $28 பில்லியன் மதிப்பிலான கனடியப் பொருட்கள் மீது அமெரிக்க ஜனாதிபதி Donald Trump விதித்த 50 சதவீத இறக்குமதி வரிகள் வார இறுதியில் நடைமுறைக்கு வந்தது.
இதற்கு பதிலளிக்கும் வகையில் சுமார் $27.6 பில்லியன் மதிப்பிலான அமெரிக்கத் தயாரிப்புகளுக்கு, அமெரிக்கா விதித்துள்ள அதே அளவிலான சுங்க வரிகளை கனடாவும் விதிக்கும் திட்டம் அறிவிக்கப்பட்டது.
இந்த வரிகள் September 8 முதல் நடைமுறைக்கு வரும் என கனடிய நிதி அமைச்சர் François-Philippe Champagne கூறியுள்ளார்.
