கனடா-அமெரிக்கா-Mexico ஆகிய நாடுகளுக்கு இடையிலான CUSMA ஒப்பந்தம் புதுப்பிக்கப்படவில்லை.
CUSMA ஒப்பந்தத்தை புதுப்பிக்க அமெரிக்கா மறுத்துள்ளது.
கனடா-அமெரிக்கா-Mexico ஆகிய நாடுகளுக்கு இடையிலான CUSMA எனப்படும் முத்தரப்பு வர்த்தக ஒப்பந்தத்தை நீட்டிக்க அமெரிக்க அதிகாரிகள் விரும்பாத நிலையில், அந்த ஒப்பந்தம் வருடாந்த மறு ஆய்வு நடைமுறைக்கு உட்படுத்தப்படவுள்ளது.
“அமெரிக்கா (CUSMA) ஒப்பந்தத்தை அதன் தற்போதைய வடிவில் புதுப்பிக்க ஒப்புக் கொள்ளவில்லை” என அமெரிக்க வர்த்தக பிரதிநிதி Jamieson Greer வெளியிட்ட அறிக்கையில் தெரிவித்துள்ளார்.
இந்த ஒப்பந்தத்தில் உள்ள குறைபாடுகள், இரு நாடுகளுடனான வர்த்தகப் பற்றாக்குறை ஆகியவற்றைச் சரி செய்வதற்காக இரு நாடுகளுடனும் அமெரிக்கா தொடர்ந்து இணைந்து செயல்படும் எனவும் Jamieson Greer மேலும் கூறினார்.
மூன்று நாடுகளின் பிரதிநிதிகளும் ஒப்பந்தத்தின் எதிர்காலம் குறித்து விவாதிப்பதற்காக புதன்கிழமை (01) காணொளி வாயிலாக சந்தித்தனர்.
இதில் கனடாவின் சார்பில், கனடா-அமெரிக்க வர்த்தக அமைச்சர் Dominic LeBlanc, கனடாவின் தலைமை பேச்சுவார்த்தையாளர் Janice Charette ஆகியோர் பங்கேற்றனர்.
இந்த சந்திப்பில் CUSMA ஒப்பந்தத்தைப் புதுப்பிப்பதில் கனடா கொண்டுள்ள விருப்பத்தை மீண்டும் வலியுறுத்தியதாக Dominic LeBlanc ஒரு அறிக்கையில் தெரிவித்தார்.
தாங்களும் அதையே விரும்புவதாக Mexico அதிகாரிகளும் கூறினர் எனவும் அவர் தெரிவித்தார்.
எங்களின் கூட்டுப் பொருளாதார செழிப்பை வலுப்படுத்த ஒன்றிணைந்து செயல்படும் வேளையில், வரும் வாரங்கள், மாதங்களில் அமெரிக்காவுடனும், Mexico-வுடனும் தொடர்ந்து இணைந்து பணியாற்ற ஆவலுடன் காத்திருக்கிறோம் என Dominic LeBlanc குறிப்பிட்டார்.
இந்தப் பேச்சுவார்த்தைகளில், புதன்கிழமை (01) எந்த ஒரு முடிவும் எட்டப்படும் என எதிர்பார்க்கவில்லை என கனடிய பிரதமர் Mark Carney முன்னதாகத் தெரிவித்திருந்த நிலையில், கால நீட்டிப்புக்கான ஆவணத்தில் கையெழுத்திட வாய்ப்பில்லை என்பதை அமெரிக்க அதிபர் Donald Trump சுட்டிக்காட்டியிருந்தார்.
இந்த முத்தரப்பு வர்த்தக ஒப்பந்தத்தில், புதன்கிழமை ஒரு முக்கியமான காலக்கெடுவாக இருந்தது.
July 1-ஆம் திகதிக்குள், மூன்று நாடுகளைச் சேர்ந்த அதிகாரிகளும் CUSMA ஒப்பந்தத்தை 16 ஆண்டு காலத்திற்கு புதுப்பிக்க விரும்புகிறார்களா என்பது குறித்து ஏனைய நாடுகளுக்கு தெரிவிக்க வேண்டும் என்ற காலக்கெடு இருந்தது.
கடந்த February மாதம் அமெரிக்க ஜனாதிபதி Donald Trump, கனடாவிலிருந்து இறக்குமதி செய்யப்படும் பொருட்கள் மீது பரவலாக வரிகளை விதித்ததிலிருந்து, கனடாவும் அமெரிக்காவும் நீண்டகால வர்த்தகப் போரில் சிக்கியுள்ளன.
