கனடாவில் அகதி கோரிக்கை மறுக்கப்பட்ட இலங்கை தமிழர் ஒருவருக்கு, கனடிய எல்லை பாதுகாப்பு முகாமையகம் (CBSA) நாடு கடத்தல் உத்தரவை பிறப்பித்துள்ளது.
இலங்கையின் இன அழிப்பு போரின் சாட்சியாளரான அவருக்கு இந்த உத்தரவு பிறப்பிக்கப்பட்டிருப்பது, அவரது நண்பர்கள் மற்றும் மனித உரிமை ஆர்வலர்கள் மத்தியில் பெரும் கவலையை ஏற்படுத்தியுள்ளது.
இலங்கையைச் சேர்ந்த லக்சிகன் புனிதராசா என்பவருக்கே கனடாவில் இருந்து வெளியேறுவதற்கான இந்த இறுதி உத்தரவை CBSA பிறப்பித்துள்ளது.
கனடியக் குடியேற்றச் சட்டத்தின் கீழ் விடுக்கப்பட்டுள்ள இந்த இறுதி வழிகாட்டுதல் கடிதத்தின்படி, அவர் உடனடியாக கனடாவை விட்டு வெளியேற வேண்டும் என உத்தரவிடப்பட்டுள்ளது.
இந்த நாடு கடத்தல் உத்தரவை எதிர்கொள்ளும் வகையில், வியாழக்கிழமை (05) Vancouver சர்வதேச விமான நிலையத்தில் உள்ள எல்லைப் பாதுகாப்பு அதிகாரிகளிடம் சரணடையுமாறு கடுமையான சட்ட எச்சரிக்கையுடன் கூடிய இறுதி வழிகாட்டுதல் கடிதம் அவருக்கு அனுப்பப்பட்டுள்ளது.
CBSA Pacific பிராந்திய அமுலாக்கப் பிரிவினால் விடுக்கப்பட்ட இந்த இறுதி கடிதத்தில், இதனைப் பின்பற்றத் தவறினால் கடுமையான விளைவுகளை (கைது நடவடிக்கை உள்ளிட்ட சட்ட ரீதியான விளைவுகள்) சந்திக்க நேரிடும் என லக்சிகன் புனிதராசா எச்சரிக்கப்பட்டுள்ளார்.
CBSA Pacific பிராந்திய அமுலாக்கப் பிரிவினால் இது குறித்து அனுப்பப்பட்ட இறுதி கடிதத்தின் பிரதியை தேசியம் நண்பர்கள் மூலம் பெற்றுக் கொண்டது.
இந்த நாடு கடத்தல் முடிவை தற்காலிகமாக ஒத்தி வைக்குமாறு லக்சிகன் புனிதராசா தரப்பில் விடுக்கப்பட்ட இறுதி கோரிக்கையும் கனடிய அதிகாரிகளினால் நிராகரிக்கப்பட்டுள்ளதாக தெரியவருகிறது.
இலங்கையில் தற்போது அவருக்கு எந்தவிதமான பாதுகாப்பு அச்சுறுத்தலோ அல்லது ஆபத்தோ இல்லை என அதிகாரிகள் தங்களது இறுதி முடிவில் தெரிவித்துள்ளதாக அறியமுடிகிறது.
எனினும், இந்த முடிவுக்கு லக்சிகன் புனிதராசாவின் நண்பர்கள் கடும் எதிர்ப்பு தெரிவித்துள்ளனர்.
இலங்கையின் இன அழிப்பு போரின் நேரடி சாட்சியாளராக லக்சிகன் புனிதராசா விளங்குவதாகவும், தற்போதைய சூழலில் அவர் மீண்டும் இலங்கைக்கு திருப்பி அனுப்பப்பட்டால் அவரது உயிருக்கு கடுமையான ஆபத்து ஏற்படும் எனவும் அவரது நண்பர்கள் தேசியத்திடம் கவலை தெரிவித்துள்ளனர்.
இந்த நாடு கடத்தல் உத்தரவு கனடிய தமிழ் சமூகத்தினரிடையே அதிர்ச்சியை ஏற்படுத்தியுள்ளது.
