Belleville யூத வழிபாட்டு தலத்திற்கு (Synagogues) வெளியே கடந்த ஞாயிற்றுக்கிழமை (20) அரங்கேறிய துப்பாக்கிச் சூட்டுச் சம்பவம் திட்டமிடப்பட்ட வெறுப்புணர்வு சார்ந்த குற்றச் செயல் என தெரிவிக்கப்படுகிறது.
யூத சமூகத்தினர் தங்களின் புனித நாளான Yom Kippu வழிபாட்டிற்காக கூடியிருந்த வேளையில் இந்தத் தாக்குதல் நிகழ்ந்தது.
Sons of Jacob Synagogue யூத வழிபாட்டு தலத்திற்கு வெளியே நிகழ்ந்த இந்த தாக்குதல், யூத சமூகத்தினரை குறிவைத்து நடத்தப்பட்ட திட்டமிடப்பட்ட வெறுப்புணர்வு சார்ந்த குற்றச் செயல் என Belleville காவல்துறையின் தலைமை அதிகாரி Murray Rodd அதிகாரப்பூர்வமாக உறுதிப்படுத்தியுள்ளார்.
இந்தத் தாக்குதலின் அதிர்ச்சியூட்டும் புதிய விவரங்கள், ஒளிப்பதிவு ஆதாரங்களை வியாழக்கிழமை (24) நடைபெற்ற செய்தியாளர் சந்திப்பில் காவல்துறையினர் வெளியிட்டுள்ளனர்.
இந்தத் தாக்குதலின் போது எடுக்கப்பட்ட குறுகிய ஒளிப்பதிவை காவல்துறையினர் வெளியிட்டனர்.
அதில், தாக்குதல் நடத்திய முன்னாள் கனடிய இராணுவ உறுப்பினரான Sean Ward, “நீங்கள் யூதர்களுக்காக மரணிக்கப் போகிறீர்கள்” (You are going to die for the Jews) என உரத்த குரலில் கூறிக்கொண்டு துப்பாக்கிச்சூடு நடத்தியது பதிவாகியுள்ளது.
துப்பாக்கி தாரியான Sean Ward அந்த வழிபாட்டுத் தலத்தை முழுமையாக அழிக்கவும், அங்குப் பிரார்த்தனையில் ஈடுபட்டிருந்த ஏராளமான யூதர்களை கொல்லவும் தேவையான ஆயுதங்கள், வெடிபொருட்களுடன் சென்றிருந்ததாக காவல்துறையினர் தெரிவித்தனர்.
நீண்ட நேரம் துப்பாக்கிச் சண்டையில் ஈடுபடுவதற்கான கூடுதல் ஆயுதங்கள் அவரிடம் இருந்துள்ளன என காவல்துறையின் தலைமை அதிகாரி செய்தியாளர் மாநாட்டில் உறுதிப்படுத்தினார்.
இந்தத் துப்பாக்கி தாரியை தடுத்து நிறுத்திய Belleville காவல்துறை அதிகாரி Const. Jeff Smith தொடர்ந்து மருத்துவமனையில் அனுமதிக்கப்பட்டுள்ளதாக Murray Rodd தெரிவித்தார்.
கழுத்து உட்பட பல இடங்களில் காயமடைந்த 13 ஆண்டுகள் அனுபவம் வாய்ந்த இந்த காவல்துறை அதிகாரி குணமடைந்து வருவதாக தெரிவிக்கப்பட்டுள்ளது.
இந்தச் சம்பவத்தைத் தொடர்ந்து அனைத்து யூத ஆலயங்களுக்கும் பாதுகாப்பு கோரிக்கை விடுக்கப்பட்டுள்ளது.
யூத அமைப்பான B’nai Brith கனடிய மத்திய அரசிடம் இந்த அவசர கோரிக்கை விடுத்துள்ளது.
கனடாவில் உள்ள அனைத்து யூத வழிபாட்டுத் தலங்களுக்கும் அரச நிதி உதவியுடன் ஆயுதம் ஏந்திய தகுதியான பாதுகாப்பு காவலர்களை நியமிக்க அல்லது போதிய காவல்துறை பாதுகாப்பை வழங்க வேண்டும் என B’nai Brith வலியுறுத்தியுள்ளது.
