அமெரிக்காவுக்கு எதிரான தனது வரிக் கட்டண பதிலடி நடவடிக்கையில் சில மாற்றங்களை கனடிய அரசாங்கம் மேற்கொண்டுள்ளது.
கனடிய தொழில்துறையினரின் கருத்துக்களுக்கு அமைவாக இந்த மாற்றம் அமைவதாக அரச தரப்பு தெரிவிக்கிறது.
இரு தரப்பு பேச்சுவார்த்தை கடந்த வாரம் முறிவடைந்த நிலையில் அமெரிக்க ஜனாதிபதி Donald Trump விதித்துள்ள வரிகளை கனடிய வணிக நிறுவனங்கள் தொடர்ந்து எதிர்கொண்டு வருகின்றன.
அதேவேளையில், கனடிய அரசாங்கம் திட்டமிட்டுள்ள பதிலடி நடவடிக்கைகள் நடைமுறைக்கு வருவதற்கு அவை காத்திருக்கின்றன.
இந்த நிலையில் கனடாவின் பதில் வரிப் பட்டியலில் சில மாற்றங்களைச் செய்து வருவதாக கனடா நிதியமைச்சு தெரிவித்துள்ளது.
கனடியத் தொழில்துறையினரிடமிருந்து பெற்றுவரும் கருத்துகளுக்கு அமைவாக இந்த மாற்றங்கள் முன்னெடுக்கப்படுவதாக புதன்கிழமை (26) மாலை வெளியான கனடிய நிதி அமைச்சின் அறிக்கை தெரிவிக்கிறது.
அமெரிக்காவில் இருந்து இறக்குமதி செய்யப்படும் மீன், கடல் உணவுப் பொருட்கள் மீது சுங்க வரி விதிக்கப்படாது என அந்த அறிவித்தலில் தெளிவு படுத்தப்பட்டுள்ளது .
கனடிய அரசாங்கம் அமெரிக்காவிலிருந்து இறக்குமதி செய்யப்படும் நூற்றுக்கணக்கான பொருட்கள் மீது 15 முதல் 50 சதவீதம் வரையிலான சுங்க வரிகளை விதிக்க திட்டமிட்டு அது குறித்த அறிவித்தலை செவ்வாய்க்கிழமை (25) வெளியிட்டது இங்கு குறிப்பிடத்தக்கது.
கனடா மேலும் பழிவாங்கும் நடவடிக்கைகளை மேற்கொண்டால், Donald Trump நிர்வாகம் அதை கடுமையாக எதிர்கொள்ளும் என அமெரிக்க வர்த்தக பிரதிநிதி Jamieson Greer பலமுறை தெரிவித்துள்ள நிலையில் இந்த மாற்றம் அறிவிக்கப்பட்டுள்ளது.
