அமெரிக்காவுக்கு எதிராக கனடா பல வரிகளை அறிவித்துள்ளது.
அமெரிக்காவின் நூற்றுக்கணக்கான தயாரிப்புகள் மீதான கனடாவின் பதிலடி வரி விதிப்பு பட்டியல் வெளியானது.
அமெரிக்காவின் 700 பொருட்கள் மீது பதிலடி நடவடிக்கையாக கூடுதல் வரிகளை கனடா செவ்வாய்க்கிழமை (25) அறிவித்தது.
கனடிய அமைச்சரவையின் பல்வேறு உறுப்பினர்கள் தலைநகர் Ottawa-வில் உள்ள ஒரு உற்பத்தி நிறுவனத்தில் செய்தியாளர் சந்திப்பொன்றை நடத்தினர்.
அமெரிக்காவின் இறக்குமதி வரிகளால் பாதிக்கப்பட்டுள்ள கனடியத் தொழிலாளர்கள், வணிகங்களுக்கு ஆதரவளிக்கும் வகையிலான புதிய நடவடிக்கைகளை அறிவிப்பதற்காக, மத்திய அமைச்சர்கள் இந்த செய்தியாளர் சந்திப்பை முன்னெடுத்தனர்.
இந்த செய்தியாளர் சந்திப்பில் அமைச்சர்கள் François-Philippe Champagne (நிதி), Mélanie Joly (தொழில்துறை), Patty Hajdu (வேலைவாய்ப்பு – குடும்பங்கள்), Evan Solomon (செயற்கை நுண்ணறிவு – digital புத்தாக்கம்) ஆகியோர் கலந்து கொண்டனர்.
அங்கு அமெரிக்கப் பொருட்களைப் பாதிக்கும் வகையிலான, சமமான மதிப்பிலான பதிலடி வரி விதிப்பு திட்டத்தை அமெரிக்கா மீது செயல்படுத்தப் போவதாக கனடிய மத்திய அரசு அறிவித்துள்ளது.
அமெரிக்க பொருட்கள் மீது 15, 25, 50 சதவீத வரிகளை விதிக்கவுள்ளதாக கனடிய அதிகாரிகள் இந்த செய்தியாளர் சந்திப்பில் தெரிவித்தனர்.
சுமார் $27.6 பில்லியன் மதிப்பிலான அமெரிக்கத் தயாரிப்புகளுக்கு, அமெரிக்கா விதித்துள்ள அதே அளவிலான சுங்க வரிகளை கனடாவும் விதிக்கவுள்ளதாக நிதியமைச்சர் François-Philippe Champagne தெரிவித்தார்.
சுமார் $28 பில்லியன் மதிப்பிலான கனடியப் பொருட்கள் மீது அமெரிக்க ஜனாதிபதி Donald Trump விதித்த 50 சதவீத இறக்குமதி வரிகள் வார இறுதியில் நடைமுறைக்கு வந்ததைத் தொடர்ந்து இந்த அறிவித்தல் வெளியானது.
இந்த வரிகள் September 8 முதல் நடைமுறைக்கு வரும் என அமைச்சர் François-Philippe Champagne கூறினார்.
கனடியத் தொழில்துறையை பாதுகாக்கவும் வலுப்படுத்தவும் இந்த நடவடிக்கைகள் அவசியம் எனவும் அவர் கூறினார்.
கனடாவின் இறக்குமதி வரிகள் பெரும்பாலும், அமெரிக்காவின் புதிய வரிகளால் கடுமையாகப் பாதிக்கப்பட்டுள்ள பொருட்களின் மீது கவனம் செலுத்துகின்றன.
இவற்றுள் உருக்கு இரும்பு (Steel), பால் பொருட்கள், வீட்டு உபயோகப் பொருட்கள், விவசாய உபகரணங்கள், காகிதம், மின்னணு பொருட்கள் ஆகியவை அடங்குகின்றன.
எமது தொழிலாளர்கள், வணிகங்கள், தொழில்துறைக்கு தேவையான அனைத்து உதவிகளையும் வழங்க Mark Carney அரசாங்கம் தயாராக உளளதாவும் அமைச்சர் François-Philippe Champagne தெரிவித்தார்.
