Ontario முதல்வருக்கு Angus Reid கருத்துக் கணிப்பு நிறுவனம் சட்டப்பூர்வ கடிதம் ஒன்றை அனுப்பியுள்ளது.
Angus Reid ஒரு “போலி கருத்துக் கணிப்பை” வெளியிட்டதாக Ontario முதல்வர் Doug Ford அண்மையில் குற்றம் சாட்டியிருந்தார்.
இதனைத் தொடர்ந்து முதல்வருக்கு சட்டப்பூர்வ கடிதம் ஒன்றை அனுப்பியுள்ளதாக Angus Reid கருத்துக் கணிப்பு நிறுவனம் வியாழக்கிழமை (18) உறுதிப்படுத்தியது.
இந்த விடயத்தில் Doug Ford தனது கருத்தை மீளப் பெற Angus Reid தனது கடித்ததில் வலியுறுத்தியுள்ளது
June 11 வெளியிடப்பட்ட கருத்து கணிப்பில், கனடாவின் முதல்வர்களில் Doug Ford மிகவும் செல்வாக்கற்றவராக மதிப்பிடப்பட்டுள்ளார் என, Angus Reid தெரிவித்திருந்தது.
Angus Reid வெளியிட்ட இந்த கருத்துக் கணிப்பின்படி, Ontario வாக்காளர்களிடையே Doug Ford 21 சதவீத ஆதரவை பெற்றுள்ளார்.
இது கனடாவின் முதல்வர்களிடையே மிகக் குறைந்த ஆதரவு விகிதத்தையும், முதல்வராக அவர் பெற்றதிலேயே மிகக் குறைந்த ஆதரவு விகிதத்தையும் குறிக்கிறது.
இந்தக் கருத்துக் கணிப்பு குறித்து கேள்வி எழுப்பப்பட்ட போது, NDP, Liberal கட்சி சட்டமன்ற உறுப்பினர்களிடம் மட்டுமே Angus Reid கருத்துக் கணிப்பை நடத்தியதாக கூறி, அந்த முடிவுகளை Doug Ford நிராகரித்தார்.
“அவர்கள் இந்தப் போலியான கருத்துக் கணிப்பை வெளியிட, NDP, Liberal கட்சிகளின் உறுப்பினர்களிடம் கருத்துக்கணிப்பு நடத்துகிறார்கள்,” என முதல்வர் கூறியிருந்தார் .
இப்போது தேர்தல் நடத்தப்பட்டால், தனது அரசாங்கம் “மிகப்பெரிய பெரும்பான்மையுடன்” வெற்றி பெறும் என தமது உள்ளகக் கருத்துக் கணிப்புகள் தெரிவிப்பதாகவும் அவர் கூறியிருந்தார்.
இதற்கு பதிலளிக்கும் விதமாக, Angus Reid கருத்துக் கணிப்பு நிறுவனம் முதல்வருக்கு ஒரு சட்டப்பூர்வ கடிதத்தை அனுப்பியதாக தெரிவித்தது.
முதல்வரின் விமர்சனத்திற்குப் பகிரங்கமாகப் பதிலளித்தது மட்டுமல்லாமல், Doug Ford தனது கருத்துக்களைத் திரும்பப் பெறக் கோரி ஒரு சட்டப்பூர்வ கடிதத்தையும் Angus Reid அனுப்பியுள்ளது.
Angus Reid நிறுவனம் தனது பணிகளையும், சுதந்திரமான, கட்சி சார்பற்ற பொதுக் கருத்து கணிப்பில் தமக்கிருக்கும் நீண்ட வரலாற்றையும் நிறுவனத்தின் தலைவர் Shachi Kurl ஓர் அறிக்கையில் உறுதிப்படுத்தினார்.
இந்த விடயத்தை ஊடகங்களில் விவாதிக்கும் நோக்கம் தமக்கு இல்லை என கூறிய அவர், ஆனாலும் Doug Ford தெரிவித்த பொதுக் கருத்து திருத்தப்பட வேண்டும் என நாங்கள் நம்புவதாக தெரிவித்தார்.
இந்த வழக்கறிஞர் கடிதத்தைப் பெற்றது குறித்தோ அல்லது அதற்குப் பதிலளித்தது குறித்தோ ஊடகங்களின் கேள்விக்கு Doug Ford அலுவலகம் உடனடியாக பதிலளிக்கவில்லை என்பது குறிப்பிடத்தக்கது.
