Toronto காவல்துறை அதிகாரியை கொலை செய்ததாக குற்றம் சாட்டப்பட்ட நபர், மருத்துவமனை படுக்கையில் இருந்து காணொளி வாயிலாக நீதிமன்றத்தில் முன்னிலையானார்.
கடந்த வாரம் Toronto காவல்துறை அதிகாரியை சுட்டுக் கொன்றதாக குற்றம் சாட்டப்பட்டுள்ள 19 வயதான Nicholas Bennett, முதல்நிலைக் கொலை உள்ளிட்ட குற்றச்சாட்டுகளை முறைப்படி எதிர்கொள்வதற்காக, மருத்துவமனை படுக்கையில் இருந்து காணொளி மூலம் வெள்ளிக்கிழமை (19) நீதிமன்றத்தில் முன்னிலையானார்.
நீதிமன்றத்தில் என்ன நடக்கிறது என்பதை Nicholas Bennett கேட்கவும் புரிந்துகொள்ளவும் முடிந்தால், கட்டை விரலை உயர்த்திக் காட்டுமாறு சமாதான நீதிபதி இரண்டு முறை கோரினர்.
St. Michael’s மருத்துவமனையில் படுக்கையில் படுத்திருந்த சந்தேக நபர், இரண்டாவது கோரிக்கைக்குப் பின்னர் மெதுவாக கட்டை விரலை உயர்த்திக் காட்டினார்.
கடந்த வியாழக்கிழமை (11) Const. Marc Pinizzotto இவரினால் சுட்டுக் கொல்லப்பட்டதாக காவல்துறை குற்றம் சாட்டுகிறது.
இந்த ஆண்டின் ஆரம்பத்தில் அமெரிக்கத் தூதரகத்தின் மீது நடத்தப்பட்ட துப்பாக்கிச் சூடு உட்பட, பல துப்பாக்கிச் சூடுகள் தொடர்பான ஒரு சோதனை நடவடிக்கையில் பங்கேற்ற போது Const. Marc Pinizzotto மீது துப்பாக்கி பிரயோகம் மேற்கொள்ளப்பட்டது.
இந்த சம்பவத்தில் Nicholas Bennett காவற்துறையினரால் சுடப்பட்டு அன்று முதல் மருத்துவமனையில் சிகிச்சை பெற்று வருகிறார்.
Nicholas Bennett வெள்ளி காலை சுயநினைவுக்கு திரும்பினார் என அரசு வழக்கறிஞர் நீதிமன்றத்தில் தெரிவித்தார்.
Nicholas Bennett எதிர்வரும் திங்கட்கிழமை (22) காணொளி வாயிலாக மீண்டும் நீதிமன்றத்தில் முன்னிலையாக உள்ளார்.
அவர் பின்னர் ஒரு தேதியில் உயர் நீதிமன்றத்தில் பிணை கோரி விண்ணப்பிக்கலாம் எனவும் நீதிமன்றம் தெரிவித்தது.
காவல்துறை அதிகாரி மீதான கடந்த வாரத் தாக்குதலுக்குப் பின்னர் தலைமறைவாக இருந்த, தூதரக துப்பாக்கிச் சூடு தொடர்பான சந்தேக நபர் ஒருவரை கைது செய்துள்ளதாக காவல்துறை வியாழக்கிழமை (18) அறிவித்தது.
இதில் கைதான 19 வயதான Zara Jabbi பல குற்றச்சாட்டுகளை எதிர்கொள்கிறார்.
தூதரகத் துப்பாக்கிச் சூடு தொடர்பாக, 18 வயதான Sheldon Tracy-Stewart என்ற மற்றொரு நபர் முன்னதாக கைது செய்யப்பட்டு, பல குற்றச்சாட்டுகளை எதிர்கொள்கிறார்.
இதில் கைதானவர்களுக்கு எதிரான குற்றசாட்டுகள் எதுவும் இதுவரை நீதிமன்றத்தில் நிரூபிக்கப்படவில்லை .
பலியான காவல்துறை இறுதிச் சடங்கு அடுத்த வாரம் நடைபெற உள்ளது குறிப்பிடத்தக்கது.
