Ontario முதல்வரின் பாவனைக்காக கொள்வனவு செய்யப்பட்ட தனியார் jet விமானம் மீண்டும் விற்பனை செய்யப்பட்டுள்ளது.
முதல்வர் Doug Ford இந்த விற்பனையை புதன்கிழமை (22) உறுதிப்படுத்தினார்.
Ontario மாகாண அரசாங்கம் $28.9 மில்லியன் மதிப்பிலான தனியார் jet விமானம் ஒன்றை கொள்வனவு செய்துள்ளதாக கடந்த வாரம் அறிவித்தது.
Ontario முதல்வரின் பயணங்களுக்காக இந்த விமானம் கொள்வனவு செய்யப்பட்டதாக அறிவிக்கப்பட்டது.
ஆனாலும் இந்தக் கொள்வனவு குறித்து வெளியான கடுமையான விமர்சனங்களை தொடர்ந்து விமானத்தை உடனடியாக விற்பனை செய்ய முடிவு செய்யப்பட்டது.
இந்த நிலையில் குறித்த தனியார் jet விமானம் கொள்வனவு செய்யப்பட்ட விலைக்கு விற்கப்பட்டுள்ளதாக Doug Ford உறுதிப்படுத்தினார்.
ஆனாலும் விமானக் கொள்முதல் தொடர்பாக மாகாணத்திற்கு ஏற்பட்ட மேலதிக செலவுகள் என்ன என்பது இன்னும் தெளிவாகத் தெரியவில்லை.
இந்த விமான கொள்வனவு, விற்பனை தொடர்பான மேலதிக செலவுகள் எவையேனும் இருப்பின், அவற்றை Doug Ford தனிப்பட்ட முறையில் திருப்பிச் செலுத்த வேண்டும் என எதிர்க்கட்சித் தலைவர் Marit Stiles வலியுறுத்தியுள்ளார்.
இந்த விமானம் தேவை என தாம் நம்புவதாகவும், ஆனால் பொதுமக்கள் கருத்தை தெளிவாக கேட்டறிந்த பின்னர் அதை மீண்டும் விற்றுவிட தீர்மானித்ததாக Doug Ford முன்னர் கூறியிருந்தார்.
இருப்பினும், தனக்கு எதிராக ஒரு “இரட்டை நிலைப்பாடு” கையாளப்படுவதாக நம்புவதாகவும், பிரதமர் Mark Carney உட்பட கனடாவில் அதிகம் ஆய்வுக்குல்ளாகும் அரசியல்வாதி தான் எனவும் அவர் கூறினார்.
Ontario போன்ற ஒரு பெரிய மாகாணத்திற்கு அரசாங்க விமானம் இல்லை என்பது ஒரு வகையில்“கூச்சப்படத்தக்கது” என கூறிய Doug Ford, அந்த கொள்முதலுக்கான காரணத்தை நியாயப்படுத்தினார்.
