அமெரிக்காவிற்கான கனடிய தூதர் Kirsten Hillman பதவி விலகுகிறார்.
புதிய வருடத்தில் உயர்மட்ட இராஜதந்திரி பதவியில் இருந்து அவர் பதவி விலகுவதாக செவ்வாய்கிழமை (09) ஒரு அறிக்கையில் தெரிவிக்கப்பட்டது.
புத்தாண்டில் அமெரிக்காவில் எனது பதவிக் காலத்தை முடித்துக் கொள்வதாக பிரதமர் Mark Carney-யிடம் தெரிவித்துள்ளேன் என Kirsten Hillman ஒரு நீண்ட அறிக்கையில் குறிப்பிட்டார்.
இந்தக் கடிதத்தை பிரதமர் உறுதிப்படுத்தினார்.
கனடாவிற்கும் அமெரிக்காவிற்கும் இடையிலான வர்த்தக பேச்சுவார்த்தைகள் தேக்கமடைந்துள்ள நிலையிலும், கனடா-அமெரிக்கா-Mexico ஒப்பந்தத்தின் (CUSMA) மறு ஆய்வு 2026-ஆம் ஆண்டு ஆரம்பிக்கவுள்ள நிலையிலும் இந்த பதவி விலகல் அறிவித்தல் வெளியானது.
அவரது பதவி விலகலுக்கான காரணம் வெளியாகாத போதிலும், கனடாவின் பேச்சுவார்த்தை குழுவுக்கும் எதிர்வரும் மாதங்களில் தொடர்ந்து உதவ தயாராக உள்ளதாக Kirsten Hillman கூறினார்.
அமெரிக்காவிற்கான கனடாவின் தூதராக ஆறு ஆண்டுகள் உட்பட Washington-னில் எட்டு ஆண்டுகளுக்கும் மேலாக அவர் பணியாற்றுகிறார்.
March 2020-இல் இந்தப் பதவிக்கு முதன் முதலில் நியமிக்கப்பட்ட Kirsten Hillman, அந்தப் பதவியில் பணியாற்றிய முதல் பெண்மணி என்ற பெருமையை பெறுகிறார்.
இந்த நிலையில் அமெரிக்காவிற்கான அடுத்த தூதராக Mark Wiseman நியமிக்கப்பட வாய்ப்பு உள்ளதாக பல வட்டாரங்கள் தெரிவித்துள்ளன.
கடந்த March மாதத்தில் இவரை பிரதமர் தனது கனடா-அமெரிக்க உறவுகள் குழுவில் இணைத்திருந்தார் என்பது குறிப்பிடத்தக்கது.
LJI Reporter ரம்யா சேது
