அமைச்சரவையில் இருந்து விலகும் Chrystia Freeland?

அமைச்சர் Chrystia Freeland அமைச்சரவையில் இருந்து விலகுவார் என எதிர்பார்க்கப்படுகிறது.

உக்ரைனுக்கான ஒரு சிறப்புத் தூதர் பாணியிலான நியமனத்திற்காக Chrystia Freeland அமைச்சரவையில் இருந்து விலகவுள்ளதாக தெரியவருகிறது.

போக்குவரத்து, உள்நாட்டு வர்த்தக அமைச்சரின் இந்த புதிய நியமனம் குறித்த அறிவித்தல் செவ்வாய்க்கிழமை  (16) வெளியாகும் என எதிர்பார்க்கப்படுகிறது.

2015-ஆம் ஆண்டு Liberals கட்சி ஆட்சியமைத்ததிலிருந்து Toronto நகர நாடாளுமன்ற உறுப்பினரான Chrystia Freeland முக்கியப் பதவிகளை வகித்துள்ளார்.

முன்னாள் பிரதமர் Justin Trudeau அரசில் துணைப் பிரதமராகப் பணியாற்றிய அவர்,
2020-ஆம் ஆண்டில் நிதியமைச்சராக நியமிக்கப்பட்ட முதல் பெண்மணி என்ற பெருமையைப் பெற்றார்.

இலையுதிர் கால பொருளாதார அறிக்கையை தாக்கல் செய்வதற்கு சில மணி நேரங்களுக்கு முன்னர், அவர் திடீரென நிதியமைச்சர் பதவியில் இருந்து விலகியது அதிர்ச்சி அலைகளை ஏற்படுத்தியது.

அவரது பதவி விலகல் Justin Trudeau பதவி விலக வேண்டிய அழுத்தத்தை அதிகரித்தது.

இதன் பின்னணியில் நிகழ்ந்த கட்சி தலைமை போட்டியில் Chrystia Freeland ஈடுபாட்டார்.

பதவி விலகும் Chrystia Freeland-டின் உள்நாட்டு வர்த்தக அமைச்சு பதவியை, கனடா-அமெரிக்க வர்த்தக அமைச்சர் Dominic LeBlanc ஏற்றுக்கொள்வார் என தெரியவருகிறது.

அரசாங்க சபைத் தலைவர் Steve MacKinnon, Chrystia Freeland-டின் போக்குவரத்து அமைச்சு பதவியை ஏற்றுக்கொள்வார் எனவும் எதிர்பார்க்கப்படுகிறது.

Chrystia Freeland கடந்த வாரம் உக்ரைனுக்கு பயணம் செய்தார்.

இந்தப் பயணத்தின் போது உக்ரைனுக்கான கனடிய தூதர் Natalka Cmoc, முன்னாள் கனடிய பிரதமர் Jean Chretien, முன்னாள் Newfoundland and Labrador முதல்வர் Andrew Furey ஆகியோரும் உடனிருந்தனர்.

உக்ரேனிய வம்சாவளியைச் சேர்ந்த Chrystia Freeland, பத்திரிகையாளராக இரண்டு தசாப்தங்களாக உக்ரைன், ரஷ்யா ஆகிய நாடுகளில் வாழ்ந்தார் என்பது குறிப்பிடத்தக்கது.