Toronto Metropolitan பல்கலைக்கழக (TMU) வளாகத்தில் ஒருவர் வாகனத்தால் இலக்கு வைத்து மோதப்பட்டதாக காவல்துறையினர் தெரிவித்தனர்.
TMU வளாகத்தில் நான்கு பாதசாரிகள் மீது வாகனத்தை மோதி காயம் ஏற்படுத்திய சாரதி குறிப்பிட்டு ஒருவரை இலக்கு வைத்ததாக நம்புவதாக Toronto காவல்துறையினர் தெரிவித்துள்ளனர்.
செவ்வாய்க்கிழமை (15) பிற்பகல் 2 மணியளவில் இந்த சம்பவம் நிகழ்ந்தது.
சம்பவ இடத்திற்கு விரைந்த அதிகாரிகள் காயங்களுடன் நான்கு பாதசாரிகளை அடையாளம் கண்டனர்.
இவர்களில் இருவர் அவசர சிகிச்சை வண்டி மூலம் மருத்துவமனைக்கு கொண்டு செல்லப்பட்டனர்.
இவர்களில் ஒருவர் தீவிரமான, ஆனால் உயிருக்கு ஆபத்தில்லாத காயங்களுடன் உள்ளூர் மருத்துவமனைக்கு கொண்டு செல்லப்பட்டார்.
இரண்டாவது நபரின் காயங்கள் குறித்த விபரம் வெளியாகவில்லை.
காயமடைந்த ஏனைய இருவருக்கும் சம்பவ இடத்தில் சிகிச்சை வழங்கப்பட்டுள்ளதாகவும், அவர்களை மருத்துவமனைக்கு கொண்டு செல்ல வேண்டிய தேவை ஏற்படவில்லை எனவும் காவல்துறையினர் தெரிவித்தனர்.
குறித்த வாகனம் சம்பவ இடத்தில் தரித்து நிற்காமல் சென்றதாக தெரிவிக்கப்படுகிறது.
இதில் வாகன சாரதியான சந்தேக நபர் ஒரு குறிப்பிட்ட நபரை இலக்கு வைத்திருக்கலாம் என காவல்துறையினர் கூறுகின்றனர்.
இதில் சந்தேக நபரும் அவர் இலக்கு வைத்த நபரும் ஒருவருக்கொருவர் தெரிந்தவர்கள் எனவும் காவல்துறையினர் தெரிவித்தனர்,
ஆனால் அவர்களுக்கு இடையிலான உறவு குறித்த விபரங்கள் எதையும் காவல்துறையினர் வெளியிடவில்லை.
இந்த சம்பவத்துடன் தொடர்புடைய DEDZ 565 இலக்கத் தகடுடைய வாகனைத்தையும் அதன் சாரதியையும் காவல்துறையினர் தேடிவருகின்றனர்.
