கனடா – அமெரிக்கா இடையிலான இருதரப்பு பேச்சு வார்த்தைகள் வேகமெடுத்துள்ளது.
இரு நாடுகளுக்கும் இடையில் நிலவி வரும் கடுமையான வர்த்தகப் போரை முடிவுக்குக் கொண்டு வருவதற்கான இருதரப்புப் பேச்சுவார்த்தைகள் வேகமெடுத்து, இறுதி உடன்பாட்டை நோக்கி நகர்ந்து வருவதாக நம்பத்தகுந்த அரசு வட்டாரங்கள் தெரிவித்துள்ளன.
இரண்டு வாரங்களுக்கு குறைவான நாட்களில் அமெரிக்க இடைக்காலத் தேர்தல் நடைபெற உள்ள சூழலில், அதற்கு முன்பாகவே ஒரு வர்த்தக ஒப்பந்தம் கையெழுத்தாக கூடும் என்ற பலத்த எதிர்பார்ப்பு எழுந்துள்ளது.
தேர்தல் பிரச்சாரப் பேரணியில் ஞாயிற்றுக்கிழமை (25) கலந்து கொண்டு பேசிய அமெரிக்க ஜனாதிபதி Donald Trump, கனடிய அரசுடன் ஒரு சுமுகமான உடன்பாட்டை எட்டுவதற்கு தனது நிர்வாகம் மிக நெருங்கி வந்துள்ளதாக கூறினார்.
முன்னதாக, அமெரிக்க வெள்ளை மாளிகையின் முதன்மைப் பொருளாதார ஆலோசகர் Kevin Hassett முடங்கிக் கிடந்த இரு தரப்பு பேச்சுவார்த்தைகள் தற்போது புதிய வேகத்தைப் பெற்றுள்ளதாகக் குறிப்பிட்டிருந்தார்.
அமெரிக்க வர்த்தகத் துறை செயலாளர் Howard Lutnick கனடியத் தரப்புடன் கடந்த வாரம் முழுவதும் நடத்திய தீவிர ஆலோசனைகள் இந்த திடீர் முன்னேற்றத்திற்கு காரணம் எனக் கூறப்படுகிறது.
இந்த நிலையில் பரஸ்பர நன்மை பயக்கும் ஒரு வலுவான வர்த்தக உடன்பாட்டை எட்ட கனடா எப்போதும் நல்லெண்ணத்தோடு தயாராக உள்ளதாக கனடா-அமெரிக்க வர்த்தகத் துறை அமைச்சர் Dominic LeBlanc அலுவலகம் தெரிவித்துள்ளது.
கடந்த வெள்ளிக்கிழமை ( 23) வெள்ளை மாளிகை சில கனடியப் பொருட்களுக்கு 50 சதவீத வரியிலிருந்து விலக்கு அளிப்பதாக அறிவித்திருந்தது.
இதன் பின்னர் இருதரப்புப் பேச்சுவார்த்தைகள் வேகமெடுத்து வருவது குறித்த செய்தி வெளியாகியுள்ளது இங்கு குறிப்பிடத்தக்கது.
