Liberal கட்சியின் புதிய நாடாளுமன்ற உறுப்பினரை பிரதமர் Mark Carney வரவேற்றார்.
Conservative நாடாளுமன்ற உறுப்பினர் Matt Jeneroux ஆளும் Liberal அரசாங்கத்தில் இணைவதாக புதன்கிழமை (18) அறிவித்தார்.
இந்த கட்சி மாற்றத்தை புதன் காலை ஒரு சமூக ஊடகப் பதிவில் பிரதமர் அறிவித்தார்.
பொருளாதார, பாதுகாப்பு கூட்டாண்மைகளுக்கான சிறப்பு ஆலோசகர் (special advisor on economic and security partnerships) என்ற பதவியை Matt Jeneroux ஏற்றுக் கொள்வார் எனவும் Mark Carney அறிவித்தார்.
பின்னர் Edmonton நகரில் நடைபெற்ற ஒரு செய்தியாளர் சந்திப்பில் கட்சியின் புதிய நாடாளுமன்ற உறுப்பினராக Matt Jeneroux பிரதமரினால் வரவேற்கப்பட்டார்.
கடந்த மாதம் நடந்த உலகப் பொருளாதார மன்றத்தில் பிரதமர் ஆற்றிய பரவலாகப் பாராட்டப்பட்ட உரையே, தனது இந்த முடிவை தூண்டியதாக Matt Jeneroux அங்கு செய்தியாளர்களிடம் கூறினார்.
இந்த நிலையில் கட்சி மாறும் இந்த முடிவை Conservative கட்சித் தலைவர் Pierre Poilievre கடுமையாக விமர்சித்தார்.
Matt Jeneroux தனது தொகுதி மக்களை ஏமாற்றி விட்டார் என அவர் தெரிவித்தார்.
இந்த முடிவை “ஒரு துரோகம்” எனவும் அவர் கண்டித்தார்.
“மோசமான பின்னணி ஒப்பந்தங்கள்” மூலம் பெரும்பான்மை அரசாங்கத்தைப் பெற Mark Carney முயற்சிப்பதாகவும் Conservative கட்சித் தலைவர் குற்றம் சாட்டினார்.
மூன்று மாதங்களில் Liberal கட்சிக்கு மாறிய மூன்றாவது Conservative நாடாளுமன்ற உறுப்பினர் இவராவார்.
கடந்த November மாதம் Chris d’Entremont, December மாதம் Michael Ma ஆகியோர் Conservative கட்சியில் இருந்து விலகி, Liberal அரசாங்கத்தில் இணைந்தனர்.
Chris d’Entremont ஆளும் Liberal அரசில் இணைந்த சில மணி நேரத்தில் Matt Jeneroux அவருடன் இணையக் கூடும் என்ற ஊகம் வெளியாகியிருந்தது.
அதற்கு பதிலாக, அவர் முற்றிலுமாக தனது பதவியில் இருந்து விலகுவதாக அறிவித்தார்.
அவருக்கு கட்சி மாறும் எண்ணம் இல்லை எனவும் அவரது அலுவலகம் அந்த நேரம் அறிவித்திருந்தது.
ஆனாலும் Mark Carney தலைமையிலான Liberal அரசாங்கத்துடன் இணைந்து நாடாளுமன்றத்தில் தொடர்ந்து பணியாற்றவுள்ளதாக Matt Jeneroux புதனன்று வெளியிட்ட அறிக்கையில் குறிப்பிட்டார்.
“எதிர்வரும் சவால்களை எதிர்கொள்ளும் போது நமது நாட்டின் வலிமையை கட்டியெழுப்ப உதவுவதற்காக பிரதமரின் புதிய அரசாங்கத்தின் ஒரு பகுதியாக நான் அவருடன் இணைந்து பணியாற்றுவேன்” என அந்த அறிக்கையில் அவர் கூறினார்.
Conservative கட்சியின் மூன்று உறுப்பினர்கள் Liberal அரசில் இணைந்த போதிலும், பெரும்பான்மை அரசாங்கத்தை அமைப்பதற்கான 172 ஆசனங்களை இதுவரை அவர்கள் எட்டவில்லை என்பது குறிப்பிடத்தக்கது.
இந்த கட்சிமாற்ற அறிவித்தலுடன் Liberal அரசாங்கம் தற்போது நாடாளுமன்றத்தில் 169 ஆசனங்களை கொண்டுள்ளது.
Conservative 141, Bloc Quebecois 22, NDP ஏழு, பசுமை கட்சி ஒன்று என ஆசனப்பகிர்வு அமைகிறது.
மேலும் மூன்று ஆசனங்கள் வெற்றிடமாக உள்ளது.
